உடம்புக்குள் இருந்த ‘அந்த’ ரகசியம்.. 7 ஆண்டுகளாக ஆஸ்துமா என நினைத்து ஏமாந்த பெற்றோர்… ஸ்கேன் பரிசோதனையில் தெரிந்த உண்மை..!!

மும்பையில் பத்து வயது சிறுமியின் நுரையீரலில் கடந்த ஏழு ஆண்டுகளாகச் சிக்கியிருந்த பேனா மூடியை, மருத்துவர்கள் நவீன அறுவை சிகிச்சை மூலம் வெற்றிகரமாக அகற்றியுள்ளனர். அச்சிறுமிக்கு மூன்று வயது இருக்கும்போது, விளையாட்டாகப் பேனா மூடியை விழுங்கியதாகக் கூறப்படுகிறது. அதன் பிறகு, கடந்த ஏழு வருடங்களாக அவளுக்குத் தொடர்ச்சியான இருமல் மற்றும் கடுமையான மூச்சுத் திணறல் பாதிப்புகள் இருந்து வந்துள்ளன. பல மருத்துவமனைகளில் காசநோய் (TB) மற்றும் ஆஸ்துமா போன்ற நோய்களுக்கான சிகிச்சைகள் அளிக்கப்பட்டும் குணமாகாததால், இறுதியாக மும்பையில் உள்ள ஒரு முன்னணி மருத்துவமனையில் அனுமதிக்கப்பட்டாள்.

அங்குச் சிறுமியின் நுரையீரலை சிடி ஸ்கேன் (CT Scan) மற்றும் பிராங்கோஸ்கோபி (Bronchoscopy) பரிசோதனைகளுக்கு உட்படுத்தியபோது தான், இடது பக்க நுரையீரலில் பிளாஸ்டிக் பேனா மூடி ஒன்று சிக்கியிருப்பது கண்டுபிடிக்கப்பட்டது. உடனடியாகச் செயல்பட்ட மருத்துவக் குழுவினர், நெகிழ்வுத்தன்மை கொண்ட பிராங்கோஸ்கோபி கருவியைப் பயன்படுத்தி, எவ்வித பெரிய தழும்புகளும் இன்றி அந்த மூடியை வெற்றிகரமாக வெளியே எடுத்தனர். சிறு குழந்தைகளுக்குத் தொடர்ச்சியாக ஏற்படும் சுவாசப் பிரச்சனைகளை அலட்சியப்படுத்தாமல், உடனே தகுந்த மருத்துவப் பரிசோதனைகளை மேற்கொள்ள வேண்டும் என்பதற்கு இச்சம்பவம் ஒரு முக்கிய எச்சரிக்கையாக அமைந்துள்ளது.