மதுரை ரயில் நிலையத்தில் இளம் ஜோடி ஒன்று, புகழ்பெற்ற ‘காதல் கோட்டை’ திரைப்படத்தின் கிளைமாக்ஸ் காட்சியைப் போல இன்ஸ்டாகிராம் ரீல்ஸ் வீடியோ எடுத்து வெளியிட்டுள்ளனர். அந்தப் படத்தில் வரும் சூர்யா – கமலி கதாபாத்திரங்களை நினைவுபடுத்தும் வகையில், ரயில் பெட்டிகளுக்குள் தேடுவது மற்றும் பிளாட்பாரத்தில் ஓடுவது எனப் பாதுகாப்பு மிகுந்த ரயில் நிலையத்தையே தங்களது படப்பிடிப்பு தளம் போல மாற்றி வீடியோ எடுத்துள்ளனர். படத்தில் வரும் அடையாளத்திற்குப் பதிலாக, இந்த இளைஞர் தனது பனியனில் வாகைப்பூவை வரைந்து காட்டி நடித்துள்ள இந்த வீடியோ சமூக வலைதளங்களில் வேகமாக வைரலானது.

தினமும் பல்லாயிரக்கணக்கான பயணிகள் வந்து செல்லும் மிக முக்கியமான மதுரை சந்திப்பு ரயில் நிலையத்தில், இந்த வீடியோவை எடுப்பதற்கு அந்த ஜோடி ரயில்வே நிர்வாகத்திடம் இருந்து எந்தவொரு முறையான முன் அனுமதியும் பெறவில்லை. ஓடும் ரயிலுக்கு மிக அருகிலும், பிளாட்பாரத்திலும் அவர்கள் ஓடிப் பிடித்து விளையாடி வீடியோ எடுத்தது, அங்கு வரும் பொதுமக்களின் பாதுகாப்புக்கு அச்சுறுத்தலாகவும் பெரும் இடையூறாகவும் அமைந்தது.

இந்த வீடியோ சமூக வலைதளங்களில் பரவியதைத் தொடர்ந்து, நெட்டிசன்கள் பலரும் “இது ரயில் நிலையமா அல்லது ரீல்ஸ் நிலையமா?” என்று கேள்விகளை எழுப்பி தங்களது கண்டனங்களைப் பதிவு செய்தனர். பொதுமக்களுக்கு இடையூறு விளைவித்தது மற்றும் ரயில்வே விதிமுறைகளை மீறியது ஆகிய காரணங்களுக்காக, ரயில்வே பாதுகாப்பு படை மற்றும் ரயில்வே போலீசார் அந்த தம்பதியினர் மீது தற்போது வழக்குப்பதிவு செய்து தீவிர விசாரணை நடத்தி வருகின்றனர்.