“ரேஷன் கடையைத் திறந்ததும் காத்திருந்த பேரதிர்ச்சி..! கோதுமை மூட்டையில் விலங்கு எலும்புகள்… அதிகாரிகள் அதிரடி..!!!”

மத்தியப் பிரதேச மாநிலம் டீகம்கர் மாவட்டத்தில் உள்ள அரசு நியாயவிலைக் கடையில், ஏழை எளிய மக்களுக்கு விநியோகிப்பதற்காக வைக்கப்பட்டிருந்த கோதுமை மூட்டையில் விலங்குகளின் எலும்புகள் மற்றும் மண்டை ஓடு கண்டெடுக்கப்பட்ட சம்பவம் பெரும் அதிர்ச்சியை ஏற்படுத்தியுள்ளது. நன்னி டெஹ்ரி கிராமத்தில் உள்ள ரேஷன் கடையில் கோதுமை விநியோகத்தின்போது, முதல் மூட்டையைத் திறந்தவுடன் உள்ளே விலங்கின் மண்டை ஓடு போன்ற எலும்புகள் இருப்பதைப் பார்த்து பொதுமக்கள் அதிர்ச்சியடைந்தனர். இதனால் கோபமடைந்த மக்கள், அந்தப் பொருட்களை வாங்க மறுத்து கடையின் முன்பு திரண்டு தீவிரப் போராட்டத்தில் ஈடுபட்டனர். இது மக்களின் உடல்நலம் மற்றும் உணவுப் பாதுகாப்பு சார்ந்தது மட்டுமல்லாமல், தங்களின் மத உணர்வுகளையும் புண்படுத்தும் செயல் என்று கிராம மக்கள் வேதனை தெரிவித்துள்ளனர்.

இந்தச் சம்பவம் குறித்த தகவல் கிடைத்ததும், உணவு வழங்கல் துறை அதிகாரி சர்தக் திவாரி உடனடியாக சம்பவ இடத்திற்கு விரைந்து வந்து சோதனைகளை மேற்கொண்டார். முதற்கட்ட விசாரணையில், இந்த கோதுமை விதிஷா மாவட்டத்தில் உள்ள ‘சங்கல்ப் கிடங்கிலிருந்து’ டீகம்கர் மாவட்டத்திற்கு கொண்டுவரப்பட்டது தெரியவந்துள்ளது. பாதுகாப்பு முன்னெச்சரிக்கையாக, அந்த நியாயவிலைக் கடை உடனடியாக சீல் வைக்கப்பட்டு, அங்குள்ள கோதுமை விநியோகம் முற்றிலும் நிறுத்தப்பட்டது. மேலும், பாதிக்கப்பட்ட கோதுமை மூட்டைகளைத் திரும்பப் பெற்றுக்கொண்டு, மக்களுக்குப் புதிய மற்றும் தரமான கோதுமையை வழங்க அதிகாரிகள் உத்தரவிட்டுள்ளனர்.

டீகம்கர் மாவட்டத்தில் இது போன்ற தரம் குறைந்த மற்றும் அசுத்தமான ரேஷன் பொருட்கள் விநியோகிக்கப்படுவது இது முதல் முறையல்ல. இதற்கு முன்னரும் தமோஹ் மாவட்டத்திலிருந்து கொண்டுவரப்பட்ட ஆயிரக்கணக்கான மூட்டை கோதுமைகளில் வண்டுகள், மண் மற்றும் அழுகிய தானியங்கள் கண்டறியப்பட்டு அவை திருப்பி அனுப்பப்பட்டன. அடுத்தடுத்து நிகழும் இத்தகைய சம்பவங்கள், அரசு கிடங்குகளில் தானியங்களைச் சேகரிக்கும் முறை மற்றும் விநியோகத்திற்கு முந்தைய தரக்கட்டுப்பாட்டு சோதனைகளின் நம்பகத்தன்மை குறித்து மக்கள் மத்தியில் பெரிய கேள்விகளை எழுப்பியுள்ளதுடன், இதற்கு காரணமானவர்கள் மீது கடுமையான நடவடிக்கை எடுக்க வேண்டும் என்ற கோரிக்கையையும் வலுக்கச் செய்துள்ளது.