“கனடால பாத்திரம் கழுவ எவ்ளோ தருவாங்க..?” கிண்டல் செய்த நெட்டிசன்கள்… கோபப்படாமல் சிரித்துக்கொண்டே நெட்டிசனின் வாயை அடைத்த இந்தியப் பெண்..!!

சோஷியல் மீடியாவில் மக்கள் பெரும்பாலும் கிண்டல் அல்லது கேலி செய்யும் கருத்துகளை எதிர்கொள்ள வேண்டியுள்ளது. ஆனால், சிலர் கோபப்படுவதற்குப் பதிலாக, தங்களின் தனித்துவமான பாணியில் பதிலளித்து கிண்டல் செய்தவரையே வாயடைக்கச் செய்துவிடுவார்கள். ஜார்க்கண்ட் மாநிலத்தைச் சேர்ந்தவரும், தற்போது கனடாவின் டொரண்டோவில் பணிபுரிபவருமான ராட்செல் என்பவரும் இதைத்தான் செய்துள்ளார். அவரது இன்ஸ்டாகிராம் பதிவில் ஒருவர், “டொரண்டோவில் பாத்திரம் கழுவுவதற்கு உங்களுக்கு எவ்வளவு பணம் தருகிறார்கள்?” என்று கேலியாகக் கமெண்ட் செய்திருந்தார். இந்த கேள்வியைக் கண்டு கோபப்படாமல் அல்லது புறக்கணிக்காமல், ராட்செல் அதை அடிப்படையாகக் கொண்டு ஒரு சுவாரஸ்யமான இன்ஸ்டாகிராம் வீடியோவை உருவாக்கினார். அதில் அந்த கமெண்ட்டை வாசித்துவிட்டு, “சரி, வாருங்கள் இன்று டொரண்டோவில் எப்படி பாத்திரம் கழுவுகிறார்கள் என்று பார்ப்போம்” என்று கூறித் தனது நாளின் தொடக்கத்தைக் காட்டுகிறார்.

வீடியோவில் அவர் பேருந்து மற்றும் சப்வே ரயில் மூலம் நகரின் பெரிய கட்டிடத்தில் அமைந்துள்ள தனது அலுவலகத்திற்குச் செல்கிறார். ஐடி கார்டைப் பயன்படுத்தி உள்ளே சென்று காபி தயாரிக்கும் அவர், “பாத்திரம் கழுவுவதற்கு முன் காபி குடித்துக்கொள்கிறேன்” என்று நகைச்சுவையாகக் குறிப்பிடுகிறார். அவர் தனது நிறுவனத்தின் பெயரை வெளியிடாவிட்டாலும், பல கணினித் திரைகள் கொண்ட மேஜையில் அமர்ந்து ஒரு தொழில்முறை அலுவலகத்தில் பணிபுரிவதைக் காட்டுகிறார். நடுவில், “இது எனது பகுதிநேர வேலை” என்றும், அலுவலகத்தில் சக ஊழியர்களுடன் மதிய உணவு சாப்பிடுவதையும், ஜன்னல் வழியாகத் தெரியும் டொரண்டோ நகரின் அழகிய காட்சியையும் காட்டுகிறார். நாள் முடிவில், காலியான காபி கப்பை கையில் வைத்துக்கொண்டு, “அடடா, மறந்துவிட்டேனே… நான் பாத்திரம் அல்லவா கழுவ வேண்டும்! சரி நண்பர்களே, மீண்டும் நாளை வந்து பாத்திரம் கழுவுகிறேன்” என்று சிரித்தபடியே கூறி வீடியோவை முடிக்கிறார்.

https://www.instagram.com/reel/Dbr8APau2w0/?utm_source=ig_web_button_share_sheet

ராட்செலின் இந்த வீடியோ இணையத்தில் மிகவும் வைரலாகி, மக்களின் பாராட்டைப் பெற்று வருகிறது. யாருடனும் சண்டையிடாமலும், தவறான வார்த்தைகளைப் பயன்படுத்தாமலும், மிகச் சமார்த்தியமாகவும் நகைச்சுவையாகவும் குறுகிய மனப்பான்மை கொண்ட கருத்துகளுக்குப் பதிலளித்ததாகப் பயனர்கள் அவரைப் பாராட்டி வருகின்றனர். “இது ஒரு சிறந்த பதில்”, “இப்படி கிண்டல் செய்பவர்கள் தாங்களே அப்படிப்பட்ட வாழ்க்கையை வாழக் கனவு காண்கிறார்கள்” மற்றும் “மற்றொரு நாட்டிற்குச் சென்று சொந்த அடையாளத்தை உருவாக்கிக் கொள்ளும் தைரியம் அனைவருக்கும் இருப்பதில்லை” என கமெண்ட் பகுதியில் பலரும் அவருக்கு ஆதரவாகக் கருத்துகளைப் பதிவிட்டு வருகின்றனர்.