“யோவ் வன்னிகுட்டி…” பனைமரம் படுத்துட்டா பன்னிக்குட்டி ஆகாது.. பொதுவெளியில் அமைச்சரை ஜாதி ரீதியாக இழிவாகப் பேசிய நாதக பிரமுகர்.. தமிழக அரசியலில் பரபரப்பு..!!

அமைச்சர் வன்னி அரசு குறித்து நாம் தமிழர் கட்சி பிரமுகர் ஒருவர் அவதூறான மற்றும் தரக்குறைவான வார்த்தைகளைப் பயன்படுத்திப் பேசிய வீடியோ இணையத்தில் வெளியாகி பெரும் அதிர்வலைகளை ஏற்படுத்தியுள்ளது. சமூக வலைதளங்களில் இந்த வீடியோ தற்பொழுது மிகத் தீவிரமாகப் பகிரப்பட்டு வருகிறது.

அந்தப் பதிவில் பேசியுள்ள நபர், “பனைமரம் படுத்துவிட்டால் பன்னிக்குட்டி தாண்டிச் செல்லும்” என்கிற கிராமத்துப் பழமொழியைச் சுட்டிக்காட்டியுள்ளார். அதோடு நில்லாமல், அமைச்சரின் பெயரைக் கொச்சைப்படுத்தும் நோக்கில் ‘வன்னிகுட்டி’ என உருவகப்படுத்தியுள்ளார். மேலும், “யோ வன்னிகுட்டி, போனியா அமைச்சர் பதவி வாங்கினியான்னு இரு… அல்ல கைகளை அடிக்கக் கூடாதுன்னு பாக்குறோம்!” என்று பொது மேடையிலேயே அமைச்சரை ஒருமையில் பேசி, வன்முறையைத் தூண்டும் வகையில் நேருக்கு நேர் மிரட்டல் விடுத்துள்ளார்.

https://www.instagram.com/reel/Db3D0gdSRLC/?utm_source=ig_web_button_share_sheet

இந்த விவகாரம் சமூக வலைதளவாசிகளிடையே பெரும் விவாதப் பொருளாக மாறியுள்ளது. இது வெறும் சாதாரண அரசியல் விமர்சனம் கிடையாது என்றும், ஒரு குறிப்பிட்ட சமூகத்தையோ அல்லது தனிநபரையும் ஜாதி ரீதியாகக் காயப்படுத்தும் உள்நோக்கம் கொண்ட பேச்சு என்றும் பலரும் தங்களின் கண்டனங்களைப் பதிவு செய்து வருகின்றனர். பொதுவெளியில் மக்கள் பிரதிநிதியாக இருக்கும் ஓர் அமைச்சரை இப்படித் தரம் தாழ்ந்து பேசுவதும், உடல் ரீதியாகத் தாக்குவேன் என மிரட்டுவதும் ஆரோக்கியமான ஜனநாயகத்திற்கு ஆபத்தானது என நெட்டிசன்கள் கொந்தளித்து வருகின்றனர்.

தற்போது காட்டுத்தீயாய் பரவி வரும் இந்த வீடியோ பதிவிற்கு பொதுமக்கள் மற்றும் பல்வேறு சமூக அமைப்புகள் தங்களது கடுமையான எதிர்ப்புகளைத் தெரிவித்து வருகின்றன. தனிப்பட்ட முறையிலும், ஜாதியைக் குறிப்பிட்டுக் கலவரத்தைத் தூண்டும் வகையிலும் பேசிய அந்த நபர் மீது காவல்துறை உடனடியாகச் சட்டப்படி நடவடிக்கை எடுத்து கைது செய்ய வேண்டும் என்ற கோரிக்கை வலுத்து வருகிறது. இந்தச் சம்பவம் தற்பொழுது தமிழக அரசியல் வட்டாரத்தில் பெரும் பதற்றத்தையும் பரபரப்பையும் உண்டாக்கியுள்ளது.