மேட்ச் நின்னாலும்.. ஆட்டம் நிக்காது..! மழை வந்தா என்னடா..? பிட்ச் கவர் மேலயே செம டான்ஸ் போட்டு கரீபியன் கெத்து காட்டிய கிரவுண்ட் மேன்ஸ்..! வைரல் வீடியோ..!!

கரீபியன் பிரீமியர் லீக் 2026 தொடரில், வெள்ளிக்கிழமை இரவு நடைபெற்ற போட்டியில் மழை குறுக்கிட்ட போது மைதானப் பராமரிப்பாளர்கள் உற்சாகமாக நடனமாடிய சம்பவம் எதிர்பாராத சுவாரஸ்யமாக அமைந்தது. டேரன் சமி தேசிய கிரிக்கெட் மைதானத்தில் செயின்ட் லூசியா கிங்ஸ் மற்றும் ஆன்டிகுவா அண்ட் பார்புடா ஃபால்கன்ஸ் அணிகளுக்கு இடையிலான போட்டியின் போது, கனமழை காரணமாக ஆட்டம் நிறுத்தப்பட்டது. உடனே மைதானத்தை பிட்ச் கவர்களால் மூடுவதற்கு விரைந்த பராமரிப்பாளர்கள், தங்களது வழக்கமான பணியை பிட்ச் கவர்கள் மீதே ஒரு திருவிழா போல மாற்றி துள்ளலாக நடனமாடத் தொடங்கினர்.

மைதானத்தின் ஒலிபெருக்கியில் கரீபியன் இசை ஒளிபரப்பப்பட்டதும், மைதானப் பராமரிப்பாளர்கள் மிகுந்த ஆற்றலுடனும் உற்சாகத்துடனும் நடனமாடினர். மழை பெய்து ஆட்டம் தடைபட்டதால் வெறுமனே காத்திருந்த ரசிகர்களுக்கு, இந்த திடீர் நடனம் ஒரு சிறந்த பொழுதுபோக்காகவும் கொண்டாட்டமாகவும் மாறியது. மைதான ஊழியர்களின் இந்த துள்ளலான நடன வீடியோக்கள் சமூக வலைதளங்களில் வேகமாகப் பரவத் தொடங்கின. கிரிக்கெட் ரசிகர்கள் பலரும், கரீபியன் மண்ணின் பாரம்பரிய கலாச்சாரம் மற்றும் கொண்டாட்டத்தை இந்த மழை இடைவேளையில் பிரதிபலித்ததற்காகப் பராமரிப்பாளர்களைப் பாராட்டி வருகின்றனர்.

https://www.instagram.com/reel/DcCzwwlA95O/?utm_source=ig_web_button_share_sheet

கரீபியன் பிரீமியர் லீக் என்பது வெறும் கிரிக்கெட் போட்டி மட்டுமல்லாமல், அப்பகுதியின் இசை, கலாச்சாரம் மற்றும் திருவிழா மனநிலையை ஒருங்கிணைக்கும் ஒரு தொடர் என்பதை இந்த நிகழ்வு மீண்டும் நினைவூட்டியுள்ளது. மைதானத்தில் நடந்த ஆட்டத்தை விடவும், அந்த இரவின் மிகவும் மறக்க முடியாத தருணங்களில் ஒன்றாக இந்த பராமரிப்பாளர்களின் நடனம் அமைந்தது. பின்னர் மழை நின்று மீண்டும் ஆட்டம் தொடரப்பட்டதில், டிஎல்எஸ் (DLS) முறைப்படி செயின்ட் லூசியா கிங்ஸ் அணி 3 விக்கெட்டுகள் வித்தியாசத்தில் ஆன்டிகுவா அண்ட் பார்புடா ஃபால்கன்ஸ் அணியை வீழ்த்தி வெற்றி பெற்றது.