“பாட்டிலுக்கு 20 ரூபா, 30 ரூபான்னு” விஜய் இப்போ பாட்டு பாடுவாரா..? செந்தில் பாலாஜி கடும் விமர்சனம்..!!

தமிழக வெற்றிக் கழக ஆட்சியில் டாஸ்மாக் கடைகளில் பாட்டிலுக்கு ரூ.20 முதல் ரூ.30 வரை கூடுதலாக வசூலிக்கப்படுவது குறித்து முதலமைச்சர் விஜய் இப்போது பாடுவாரா என்று செந்தில் பாலாஜி காட்டமாக கேள்வி எழுப்பியுள்ளார். கரூரில் நடைபெற்ற அரசியல் நிகழ்வுகளைச் சுட்டிக்காட்டி தமிழகத்தின் தற்போதைய அரசியல் மற்றும் நிர்வாகச் சூழல் குறித்து அவர் இந்த கடுமையான விமர்சனத்தை முன்வைத்துள்ளார்.

இதுதொடர்பாகப் பேசிய அவர், டாஸ்மாக் மதுபானக் பாட்டில்களுக்கு கூடுதலாகப் பணம் வசூலிக்கப்படுவதை அமைச்சர் விக்னேஷே ஒப்புக்கொண்டு விளக்கம் அளித்துள்ளதாகச் சுட்டிக்காட்டினார். முன்னதாக எதிர்க்கட்சியாக இருந்தபோது கரூரில் நடந்த பொதுக்கூட்டத்தில் ‘பாட்டிலுக்கு 10 ரூபாய்’ என்று பாடி அப்போதைய ஆளுங்கட்சியைக் கலாய்த்த முதலமைச்சர் விஜய், தரைமட்ட யதார்த்தத்தையும் உண்மைத்தன்மையையும் முழுமையாக அறிந்திருக்க வேண்டும் என்று சாடினார். ஆனால், அவர் கள நிலவரம் தெரியாமல் யாரோ எழுதிக்கொடுத்த ஸ்கிரிப்டை மட்டுமே மேடையில் பேசினார் என்பது இதன் மூலம் நிரூபணமாகியுள்ளது என்றும் விமர்சித்தார்.

மேலும், தமிழகத்தில் தற்போது அமைந்துள்ள தமிழக வெற்றிக் கழகத்தின் ஆட்சி இதேபோன்று 5 ஆண்டுகள் தொடர்ந்தால், ஒட்டுமொத்த தமிழ்நாடும் 25 ஆண்டுகள் பின்னோக்கிச் சென்றுவிடும் என்று மிகக் கடுமையான எச்சரிக்கையையும் அவர் விடுத்துள்ளார். நிர்வாகத் திறமையின்மையாலும், தேர்தல் வாக்குறுதிகளை நிறைவேற்றாததாலும் மாநிலத்தின் வளர்ச்சி முற்றிலுமாகப் பாதிக்கப்படும் என்று அவர் தனது அரசியல் சாடலில் குறிப்பிட்டுள்ளார்.