“ரேஷன் கடையில்தான் என் வாழ்க்கை!” – எதிர்க்கட்சிகளின் சவாலுக்கு அமைச்சர் வெங்கடராமன் நெகிழ்ச்சியான பதிலடி…!!

தமிழகத்தில் நிலவி வரும் அரிசி மற்றும் அத்தியாவசிய உணவுப் பொருட்களின் விலை உயர்வு குறித்து உணவுத்துறை அமைச்சர் வெங்கடராமன் செய்தியாளர்களிடம் விளக்கமளித்துள்ளார். அண்டை மாநிலங்களான ஆந்திரா மற்றும் கர்நாடகாவில் இருந்து தமிழகத்திற்கு தேவையான அரிசி வரத்து குறைந்துள்ளதே தற்போதைய சந்தை விலை உயர்வுக்கு முக்கியக் காரணம் என்று அவர் தெளிவுபடுத்தியுள்ளார். இருப்பினும், இந்தத் தற்காலிக விலை ஏற்றத்தைக் கட்டுப்படுத்தவும், பொதுமக்களின் சுமையைக் குறைக்கவும் விலை கண்காணிப்புக் குழுவுடன் தீவிர ஆலோசனை நடத்தப்பட்டு வருவதாகவும், அடுத்த 2 முதல் 3 நாட்களுக்குள் இதுதொடர்பான முறையான அறிவிப்புகள் மற்றும் நடவடிக்கைகள் மேற்கொள்ளப்படும் என்றும் அவர் உறுதியளித்துள்ளார்.

செய்தியாளர் சந்திப்பின் போது, அரிசி விலை உயரவில்லை எனத் தான் கூறியதாக எதிர்க்கட்சிகள் பரப்பி வரும் விமர்சனங்களுக்கும் அமைச்சர் வெங்கடராமன் திட்டவட்டமாகப் பதிலடி கொடுத்துள்ளார். தான் ஒரு சாதாரண எளிய குடும்பப் பின்னணியில் இருந்து வந்தவன் என்று குறிப்பிட்ட அவர், “என்னுடைய முழு வாழ்க்கையையுமே நான் ரேஷன் கடையில்தான் வாழ்ந்திருக்கிறேன்; நாங்களும் வரிசையில் நின்று எல்லாப் பொருட்களையும் வாங்கி வந்த அடிமட்ட மக்கள்தான், இன்று அமைச்சராக வந்திருக்கிறேன்” என நெகிழ்ச்சியோடு தெரிவித்துள்ளார். மக்களின் சிரமங்களை முழுமையாக உணர்ந்தே இந்த அரசு திட்டங்களை வகுத்து வருவதாகவும், தான் பேசிய முழுப் பேச்சையும் சரியாகக் கேட்காமல் தனக்குச் சவால் விடுத்து அரசியல் செய்து வருகின்றனர் என்றும் அவர் குற்றம் சாட்டியுள்ளார்.