“ஜஸ்ட் மிஸ்.. கண் இமைக்கும் நேரத்தில் சரிந்த ராட்சத மரம்..!” அலறியடித்து ஒடிய மக்கள்.. வைரலாகும் அதிர்ச்சி வீடியோ..!!

கோயம்புத்தூர் ஆர்.எஸ்.புரம் பகுதியில் உள்ள பரபரப்பான டி.பி. சாலையில், கண் இமைக்கும் நேரத்தில் ஒரு பெரிய மரம் வேரோடு சாய்ந்து விழுந்ததில், அவ்வழியே சென்ற வாகன ஓட்டிகளும் பாதசாரிகளும் நூலிழையில் உயிர் தப்பிய அதிர்ச்சி தரும் சம்பவம் அரங்கேறியுள்ளது. வடகிழக்கு பருவக்காற்று காரணமாகத் தமிழகத்தின் பல்வேறு பகுதிகளில் பரவலாக மழை பெய்து வரும் நிலையில், கோயம்புத்தூரிலும் கடந்த சில நாட்களாகக் கனமழை பெய்து வருகிறது. இந்தச் சூழலில், நேற்று செவ்வாய்க்கிழமை மாலை டி.பி. சாலையில் மக்கள் நடமாட்டம் அதிகமாக இருந்த நேரத்தில், அங்கிருந்த ஒரு பெரிய மரம் திடீரென சாலையின் குறுக்கே முறிந்து விழுந்தது.

மரம் விழுவதைக் கண்ட வாகன ஓட்டிகள் தங்களது வாகனங்களை உடனடியாக நிறுத்தியதாலும், பாதசாரிகள் சிதறி ஓடியதாலும் ஒரு பெரும் உயிர்ச் சேதம் மற்றும் விபத்து தவிர்க்கப்பட்டது. எனினும், மரம் விழுந்ததன் காரணமாக அந்தப் பரபரப்பான சாலையில் போக்குவரத்து முற்றிலும் பாதிக்கப்பட்டுப் பெரும் நெரிசல் ஏற்பட்டது. இதுகுறித்துத் தகவலறிந்து சம்பவ இடத்திற்கு விரைந்து வந்த மாநகராட்சி ஊழியர்கள் மற்றும் தீயணைப்புத் துறையினர், சாலையில் விழுந்த மரத்தை நவீனக் கருவிகள் மூலம் வெட்டி அகற்றிப் போக்குவரத்தைச் சீரமைத்தனர். பருவமழை காலங்களில் பலவீனமான மரங்கள் குறித்து அதிகாரிகள் முன்கூட்டியே நடவடிக்கை எடுக்க வேண்டும் எனப் பொதுமக்கள் கோரிக்கை விடுத்துள்ளனர்.