வாவ்..! எவ்ளோ அழகா இருக்கு… கடலில் நீந்தி விளையாடும் பிங்க் டால்பின்ஸ்.. வைரலாகும் அரிய காட்சி..!!

ஒமனின் மஸ்கட் நகரில் உள்ள குந்தாப் கடற்கரைக்கு அருகில் இளஞ்சிவப்பு (பிங்க்) நிற டால்பின்கள் நீந்திச் சென்றது கடற்கரைக்கு வந்தவர்களை ஆச்சரியத்தில் ஆழ்த்தியுள்ளதுடன், இணையத்திலும் வைரலாகியுள்ளது. ஓமன் வளைகுடா பகுதியில் இந்தவகை கடலியல் விலங்குகளைப் பார்க்கும் அபூர்வ நிகழ்வு வீடியோவாகப் பதிவு செய்யப்பட்டுள்ளது. நீல நிறக் கடலில் இந்த டால்பின்களின் தனித்துவமான நிறம் தெளிவாகத் தெரிவதுடன், பார்ப்போரின் கவனத்தையும் ஈர்த்துள்ளது.

ஓமன் நாட்டின் தலைநகரான மஸ்கட்டில் உள்ள குந்தாப் கடற்கரை பகுதியில் இந்த அசாதாரண டால்பின் நடமாட்டம் பதிவாகியுள்ளது. அழகிய கடற்கரை மற்றும் பாறை நிறைந்த நிலப்பரப்புக்குப் பெயர்பட்ட இப்பகுதியில், இந்த இளஞ்சிவப்பு நிற டால்பின்கள் கரைக்கு மிக அருகில் நீந்தி அவ்வப்போது நீருக்கு மேலே வந்து சென்றன. இருப்பினும், மஸ்கட் கடற்கரையில் காணப்பட்ட இந்த டால்பின்களின் சரியான இனம் இதுவரை உறுதிப்படுத்தப்படவில்லை.

சில டால்பின் இனங்கள் இயற்கையாகவே இளஞ்சிவப்பு நிறத் தோலைக் கொண்டுள்ளன. உதாரணமாக, தென் அமெரிக்காவின் நன்னீர் அமைப்புகளில் காணப்படும் அமேசான் நதி டால்பின்கள் முதிர்ச்சியடையும் போது பிங்க் நிறத்தைப் பெறுகின்றன. வயது, இரத்த ஓட்டம், செயல்பாடு மற்றும் வடுக்கள் போன்ற காரணங்களால் இந்த நிற மாற்றம் ஏற்படுவதுண்டு. எவ்வாறாயினும், மஸ்கட் கடற்கரையில் காணப்பட்ட டால்பின்கள் குறித்த முழுமையான விவரங்கள் மற்றும் இந்த நிறத்திற்கான உண்மையான காரணம் குறித்த அதிகாரப்பூர்வ தகவல்கள் இன்னும் உறுதிப்படுத்தப்படவில்லை.