“டிசம்பர் 17 முதல் காணாமல் போன 22 வயது பெண்..” ஆசிரியர் கொடுத்த சாவியால் அம்பலமான ரகசிய அறையின் மர்மம்.. போலீஸ் விசாரணையில் உறைந்துபோன குடும்பத்தினர்.!!

உத்தரப் பிரதேச மாநிலம் பிலிபித் பகுதியில் கடந்த டிசம்பர் 17 ஆம் தேதி முதல் காணாமல் போனதாகத் தேடப்பட்டு வந்த 22 வயது சீக்கிய இளம்பெண் ஒருவரைப் பிலிபித் காவல் துறையினர் பத்திரமாக மீட்டுள்ளனர். மாதோதண்டா காவல் நிலைய எல்லைக்கு உட்பட்ட பகுதியைச் சேர்ந்த இந்த இளம்பெண் திடீரெனக் காணாமல் போனதைத் தொடர்ந்து, அவரது குடும்பத்தினர் அளித்த புகாரின் பேரில் காவல் துறையினர் தீவிர விசாரணை மேற்கொண்டு வந்தனர். இதில் அந்தப் பெண்ணின் தொலைபேசி அழைப்பு விவரங்களை ஆய்வு செய்தபோது, தில்நவாஸ் என்ற நபரின் தொடர்பு வெளிச்சத்திற்கு வந்தது.

இதனைத் தொடர்ந்து, காவல் துறையினர் தில்நவாஸைக் கைது செய்து விசாரணை நடத்தியதில், அவர் கொடுத்த தகவலின் அடிப்படையில் ஒரு குறிப்பிட்ட அறையைத் திறந்து அங்கு அடைத்து வைக்கப்பட்டிருந்த இளம்பெண்ணை மீட்டனர். கடந்த சில நாட்களாக பிஸ்கட் மற்றும் தின்பண்டங்களை மட்டுமே உணவாகக் கொண்டு அந்தப் பெண் அங்கு தங்கியிருந்தது தெரியவந்தது. கைதான தில்நவாஸ் அப்பகுதியில் 9 முதல் 12 ஆம் வகுப்பு மாணவர்களுக்கான பயிற்சி மையம் நடத்தி வருபவர் என்பதும், இதற்கு முன்பு ஒரு முக்கியப் பள்ளியில் இயற்பியல் ஆசிரியராகப் பணியாற்றியவர் என்பதும் விசாரணையில் உறுதி செய்யப்பட்டது.

சுமார் ஐந்து ஆண்டுகளுக்கு முன்பு அந்தப் பள்ளியில் மாணவியாக இருந்தபோதே இவர்களுக்கிடையே தொடர்பு ஏற்பட்டுள்ளது. கடந்த சில ஆண்டுகளாகவே அந்தப் பெண் இஸ்லாமிய வழிபாட்டு முறைகளைப் பின்பற்றி வந்ததை அவரது குடும்பத்தினர் ஒருமுறை கண்டறிந்து எச்சரித்திருந்த நிலையில், தற்போது அவர் தனது பாஸ்போர்ட் மற்றும் உடமைகளுடன் வீட்டை விட்டு வெளியேறியுள்ளார். தில்நவாஸ் அந்தப் பெண்ணை வெளிநாட்டிற்கு அழைத்துச் செல்ல திட்டமிட்டிருந்ததாகக் கூறப்படும் நிலையில், காவல் துறையினர் அவரைத் தடுத்து நிறுத்தி, தில்நவாஸை நீதிமன்றக் காவலில் சிறையில் அடைத்துள்ளனர். இந்தச் சம்பவம் குறித்து காவல் துறையினர் தொடர்ந்து விசாரணை நடத்தி வருகின்றனர்.