“கணவனின் கள்ளக்காதல் மட்டுமே கொடுமையாகாது..!” சென்னை உயர் நீதிமன்றத்தின் அதிரடித் தீர்ப்பு பின்னணி..!!

கணவன் வேறொரு பெண்ணுடன் வைத்திருக்கும் கள்ள உறவு மட்டுமே, இந்திய தண்டனைச் சட்டத்தின் கீழ் தானாகவே மனைவிக்கு எதிரான கொடுமையாகாது என்று சென்னை உயர் நீதிமன்றம் ஒரு முக்கியத் தீர்ப்பை வழங்கியுள்ளது. குழந்தையுடன் சேர்ந்து மனைவி தற்கொலை செய்துகொண்ட வழக்கில், குற்றம் சாட்டப்பட்ட கணவர் விடுவிக்கப்பட்டதை எதிர்த்து, உயிரிழந்த பெண்ணின் சகோதரர் தொடர்ந்த மேல்முறையீட்டு வழக்கை விசாரித்த நீதிபதி சுந்தர் மோகன் இந்த அதிரடித் தீர்ப்பை வழங்கியுள்ளார். இந்த வழக்கில் கணவருக்கு வேறொரு பெண்ணுடன் முறையற்ற உறவு இருந்தது நிரூபிக்கப்பட்டிருந்தாலும், அது மட்டுமே மனைவியைத் தற்கொலைக்குத் தூண்டும் தன்மை கொண்டதாகக் கருத முடியாது என்று நீதிமன்றம் சுட்டிக்காட்டியுள்ளது.

கடந்த 2008-ல் திருமணமான இந்தத் தம்பதியினருக்கு இடையே, திருமணத்திற்குப் பிறகு வரதட்சணைக் கோரி கணவர் பலமுறை கொடுமைப்படுத்தியதாகவும், வேறொரு பெண்ணுடன் தகாத உறவில் இருந்துகொண்டு குழந்தையையும் பராமரிக்கத் தவறியதாகவும் அரசுத் தரப்பில் வாதிடப்பட்டது. இதன் காரணமாக, மன உளைச்சலுக்கு ஆளான மனைவி தனது ஒன்றரை வயது குழந்தையுடன் தண்ணீரில் குதித்து தற்கொலை செய்துகொண்டதால், கணவருக்கு எதிராக ஐபிசி பிரிவு 498A மற்றும் 306 ஆகிய பிரிவுகளின் கீழ் நடவடிக்கை எடுக்கக் கோரப்பட்டது. ஆனால், போதிய ஆதாரங்கள் இல்லை எனக் கூறி விசாரணை நீதிமன்றம் கணவரை ஏற்கனவே விடுவித்திருந்தது.

இந்த விடுதலையை எதிர்த்துத் தொடரப்பட்ட மேல்முறையீட்டு மனுவை விசாரித்த சென்னை உயர் நீதிமன்றம், சாட்சிகள் அனைவரும் வரதட்சணைக் கொடுமை குறித்துப் பேசியிருந்தாலும், அந்த குற்றச்சாட்டுகள் சட்டப்பூர்வமாகத் தெளிவாக இல்லை என்று குறிப்பிட்டுள்ளது. இந்திய தண்டனைச் சட்டத்தின் பிரிவு 498A-ன் கீழ் ஒருவரைக் குற்றவாளியாக்க வேண்டும் என்றால், வெறும் முறையற்ற உறவைத் தாண்டி, கடுமையான கொடுமைகள் நடந்திருப்பதை அரசுத் தரப்பு உறுதியாக நிரூபிக்க வேண்டும் என்பது சட்ட விதியாகும். எனவே, விசாரணை நீதிமன்றத்தின் விடுதலைக்கான காரணங்கள் முழுமையாக ஏற்கப்படாவிட்டாலும், அரசுத் தரப்பு குற்றங்களைச் சந்தேகத்திற்கு இடமின்றி நிரூபிக்கத் தவறியதால், இந்த மேல்முறையீட்டு மனுவைத் தள்ளுபடி செய்து உயர் நீதிமன்றம் உத்தரவிட்டுள்ளது.