“ரிவர்ஸ் எடுக்க நினைச்சோம், அதுக்குள்ள…” படுகாயமடைந்த நடத்துநர் கேசவன் கண்ணீருடன் விவரித்த அந்த மரண பய நிமிடங்களின் பின்னணி..!!

தமிழகத்தில் வடகிழக்கு பருவமழை தீவிரமடைந்துள்ள நிலையில், நீலகிரி மாவட்டம் குன்னூர் – மேட்டுப்பாளையம் மலைப்பாதையில் ஏற்பட்ட பயங்கர மண்சரிவில் சிக்கிய அரசுப் பேருந்தின் நடத்துநர் பல மணி நேரப் போராட்டத்திற்குப் பிறகு உயிருடன் மீட்கப்பட்டுள்ளார். நேற்று இரவு ஊட்டி, குன்னூர் மற்றும் மேட்டுப்பாளையம் ஆகிய பகுதிகளில் விடிய விடிய கொட்டித் தீர்த்த கனமழையால், நந்தகோபால் பாலம் முதல் பர்லியார் வரை 15-க்கும் மேற்பட்ட இடங்களில் அடுத்தடுத்து மண்சரிவு ஏற்பட்டு போக்குவரத்து முற்றிலுமாக முடங்கியது. இதற்கிடையே, குன்னூரிலிருந்து கோவை நோக்கிச் சென்ற அரசுப் பேருந்து பர்லியார் அருகே வந்தபோது, எதிர்பாராதவிதமாகப் பெருக்கெடுத்து வந்த மண் மற்றும் மரங்கள் பேருந்தை முழுமையாக மூடி அமுக்கியதில் பேருந்து விபத்துக்குள்ளானது.

மழை காரணமாகப் பயணிகள் முன்கூட்டியே இறங்கிவிட்டதால், விபத்தின்போது பேருந்தினுள் ஓட்டுநர் ஜனகராஜும், நடத்துநர் கேசவனும் மட்டுமே இருந்துள்ளனர். மரங்கள் முறிந்து விழுந்ததால் பேருந்தை ரிவர்ஸ் எடுத்துப் பாதுகாப்பான இடத்திற்கு மாற்ற முயல்வதற்குள், கண் இமைக்கும் நேரத்தில் மண்சரிவு ஏற்பட்டுப் பேருந்தை அமுக்கியதாகப் படுகாயமடைந்து சிகிச்சை பெற்று வரும் நடத்துநர் கேசவன் நெகிழ்ச்சியுடன் தெரிவித்துள்ளார். தொடர்ந்து பெய்து வரும் மழையையும் பொருட்படுத்தாமல் தீயணைப்புத் துறையினரும் காவல்துறையினரும் சம்பவ இடத்திற்கு விரைந்து, பல மணி நேரம் உயிருக்கு நடுக்கடலில் போராடிக் கொண்டிருந்த நடத்துநரை முதற்கட்டமாகப் பத்திரமாக மீட்டு மேட்டுப்பாளையம் அரசு மருத்துவமனையில் அனுமதித்துள்ளனர். ஓட்டுநரை மீட்கும் பணிகள் மற்றும் மலைப்பாதையைச் சீரமைக்கும் பணிகள் தொடர்ந்து தீவிரமாக நடைபெற்று வருகின்றன.