“அம்மாவுக்காக எதையும் செய்வேன்..!” உயிருக்குப் போராடிய தாய்.. நெஞ்சை நெகிழவைக்கும் 19 வயது மகனின் நேர்த்திக்கடன்.. 8,000 கி.மீ தூரத்தைக் கடந்து ஓடும் மோனு..!!

பீகார் மாநிலத்தைச் சேர்ந்த லால்டி தேவி என்ற பெண்மணி மீன் சாப்பிடும்போது, எதிர்பாராதவிதமாக அவரது தொண்டையில் முள் சிக்கியுள்ளது. பல்வேறு சிகிச்சைகள் மேற்கொண்ட போதிலும் அவரது உடல்நிலை மிக மோசமான கட்டத்தை எட்டியதால், குடும்பத்தினரும் உறவினர்களும் பெரும் கவலையடைந்தனர். அப்போது, அவரது 19 வயது மகன் மோனு மேட்டூர்பாலா, பீகாரின் ஜெகநாபாத்தில் உள்ள பராபர் மலை பாபா சித்தேஷ்வர் நாத் கோவிலுக்குச் சென்று, தனது தாய் பூரண குணமடைந்தால் இந்தியாவில் உள்ள 12 ஜோதிர்லிங்கங்களையும் கால்களால் ஓடியே சென்று தரிசனம் செய்வதாக உருக்கமாக வேண்டியுள்ளார். ஆச்சரியப்படும் விதமாக, அவரது வேண்டுதலுக்குப் பின் லால்டி தேவியின் உடல்நிலை படிப்படியாக முன்னேறி அவர் முற்றிலும் குணமடைந்தார்.

தாயின் உயிரைக் காப்பாற்றிய இறைவனுக்குத் தனது நேர்த்திக்கடனைச் செலுத்த உறுதிகொண்ட மோனு, கடந்த மார்ச் 15-ஆம் தேதி பீகாரில் இருந்து தனது வரலாற்றுச் சிறப்புமிக்க ஓட்டத்தைத் தொடங்கினார். ஒரு நாளைக்கு சுமார் 50 கிலோமீட்டர் தூரம் ஓடுவதை இலக்காகக் கொண்டு, இதுவரை 8,000 கிலோமீட்டர் தூரத்தைக் கடந்துள்ள அவர், 6 ஜோதிர்லிங்கங்களை வெற்றிகரமாகத் தரிசித்துள்ளார். தற்போது மகாராஷ்டிராவில் இருக்கும் மோனுவுக்கு உதவியாக இரண்டு நண்பர்கள் உடன் சென்று வருகின்றனர். வழியில் எவ்வளவு தடைகளும் கஷ்டங்களும் ஏற்பட்டாலும், எஞ்சியுள்ள 6 ஜோதிர்லிங்கங்களையும் தரிசித்து நேர்த்திக்கடனை முடிக்காமல் வீடு திரும்பப் போவதில்லை என்ற அசைக்க முடியாத உறுதியுடன் அவர் தனது பயணத்தைத் தொடர்ந்து வருகிறார்.