அடுத்த விக்கெட் காலி..! விஜயபாஸ்கரைத் தொடர்ந்து தவெக-விற்குத் தாவும் டெல்டா சிங்கம்..? பயங்கர அதிர்ச்சியில் எடப்பாடி..!!

அதிமுக முன்னாள் அமைச்சரும் நன்னிலம் தொகுதி சட்டமன்ற உறுப்பினருமான ஆர். காமராஜ், தற்போதைய கட்சித் தலைமை மீதான அதிருப்தி காரணமாக அஇஅதிமுகவில் இருந்து விலகி, தமிழக வெற்றிக் கழகத்தில் இணைய முடிவு செய்துள்ளதாக அரசியல் வட்டாரத்தில் புதிய தகவல் ஒன்று பரவி வருகிறது. 2011 முதல் நன்னிலம் தொகுதியின் எம்.எல்.ஏ-வாகத் தொடர்ந்து வெற்றி பெற்று வரும் இவர், முந்தைய ஜெயலலிதா அமைச்சரவையில் உணவுத்துறை அமைச்சராகப் பதவி வகித்தவர் என்பது குறிப்பிடத்தக்கது. டெல்டா மாவட்டங்களில் அதிமுகவின் முக்கிய முகமாக விளங்கும் இவரது இந்த அரசியல் நகர்வு பற்றிய பேச்சுக்கள் தற்பொழுது பெரும் விவாதத்தை ஏற்படுத்தியுள்ளது.

சமீபத்தில் அஇஅதிமுகவின் முக்கியத் தலைவர்களான முன்னாள் சுகாதாரத்துறை அமைச்சர் சி. விஜயபாஸ்கர் மற்றும் முன்னாள் போக்குவரத்துத் துறை அமைச்சர் எம்.ஆர். விஜயபாஸ்கர் ஆகியோர் தங்களது சட்டமன்ற உறுப்பினர் பதவிகளை ராஜினாமா செய்துவிட்டு, தவெக தலைவர் ச. ஜோசப் விஜய் முன்னிலையில் அக்கட்சியில் தங்களை இணைத்துக் கொண்டனர். அவர்களைத் தொடர்ந்து மேலும் பல அஇஅதிமுக மூத்த நிர்வாகிகள் மற்றும் மாவட்டச் செயலாளர்கள் தவெக-விற்குத் தாவி வரும் நிலையில், ஆர். காமராஜின் பெயரும் இந்த வரிசையில் அடிபடுவது அஇஅதிமுக வட்டாரத்தில் பெரும் அதிர்ச்சியை ஏற்படுத்தியுள்ளது.

டெல்டா பகுதியில் அஇஅதிமுகவின் வாக்கு வங்கியைத் தக்கவைப்பதில் முக்கியப் பங்காற்றிய ஆர். காமராஜ் போன்ற மூத்த தலைவர்கள் தவெக நோக்கி நகர்வது, வரவிருக்கும் தேர்தல்களில் அஇஅதிமுகவிற்குப் பின்னடைவாக அமையலாம் என அரசியல் விமர்சகர்கள் கருதுகின்றனர். இருப்பினும், இந்த அரசியல் மாற்றம் மற்றும் அதிகாரப்பூர்வ இணைப்பு குறித்த இறுதி முடிவுகள் மற்றும் முறையான அறிவிப்புகள் சம்பந்தப்பட்ட தலைவர்களிடம் இருந்தோ அல்லது தவெக தலைமையிடம் இருந்தோ இன்னும் அதிகாரப்பூர்வமாக வெளியாகவில்லை என்பது குறிப்பிடத்தக்கது.