விஜய் கொடுத்த அசைன்மென்ட்… திராவிடக் கோட்டையைத் தாக்கும் தவெக அமைச்சர்கள்… ஆதவ் அர்ஜூனா, நிர்மல் குமாரின் அதிரடி வியூகம்..!!

தமிழகத்தில் நடைபெற்ற சட்டமன்றத் தேர்தலுக்குப் பிறகு முதலமைச்சர் விஜய் தலைமையில் தமிழக வெற்றிக் கழகம் ஆட்சி அமைத்துள்ள சூழலில், எதிர்க்கட்சிகளான திமுக மற்றும் அதிமுகவின் தொடர் விமர்சனங்களைத் தவெக அமைச்சர்களான ஆதவ் அர்ஜூனா மற்றும் சி.டி. நிர்மல் குமார் ஆகியோர் தீவிரமாக எதிர்கொண்டு வருகின்றனர். இவ்விரு அமைச்சர்களும் செய்தியாளர் சந்திப்புகள், மக்கள் பிரச்சாரங்கள் மற்றும் சமூக வலைதளங்கள் மூலமாக இரு திராவிடக் கட்சிகளுக்கும் அரசியல் ரீதியாகக் கடுமையான பதிலடி கொடுத்து வருவதாக அரசியல் வட்டாரங்கள் குறிப்பிடுகின்றன.

கடந்த மதுராந்தகம் மற்றும் தாராபுரம் இடைத்தேர்தல் பிரச்சாரங்களின் போது, அமைச்சர் ஆதவ் அர்ஜூனா “தவெகதான் உண்மையான அதிமுக” என்றும், தவெகவின் விசில் சின்னம்தான் எம்.ஜி.ஆர் மற்றும் ஜெயலலிதா ஆகியோர் விரும்பிய சின்னம் என்றும் பேசி பரபரப்பைக் கிளப்பினார். இந்த இடைத்தேர்தலில் அதிமுக சந்தித்த தோல்வியைத் தொடர்ந்து, மற்றொரு தவெக அமைச்சரான நிர்மல் குமார், அதிமுக பொதுச் செயலாளர் எடப்பாடி பழனிசாமியைச் சாடினார். கடந்த 10 ஆண்டுகளில் அதிமுக இத்தனை தோல்விகளைச் சந்தித்ததற்கு எடப்பாடி பழனிசாமி ஒருவரே காரணம் என்றும் அவர் குற்றம்சாட்டினார்.

மறுபுறம், திமுகவுக்கு எதிராகவும் இந்த இரு அமைச்சர்களும் கடுமையான விமர்சனக் கணைகளைத் தொடுத்து வருகின்றனர். விடுதலைச் சிறுத்தைகள் கட்சியிலிருந்து விலகி தவெகவில் இணைந்த அமைச்சர் ஆதவ் அர்ஜூனா, திமுக ஒரு மன்னராட்சி மனப்பான்மை கொண்ட கட்சி என்றும், அங்கு எப்போதும் குடும்ப ஆட்சி மட்டுமே நடக்கும் என்றும் கடுமையாகச் சாடினார். மேலும், உதயநிதி ஸ்டாலினைக் குறிவைத்தும் அவர் விமர்சனங்களை முன்வைக்க, அமைச்சர் நிர்மல் குமார் மிசா விவகாரம், சர்க்காரியா கமிஷன் மற்றும் திமுக ஆட்சியின் ஊழல்கள் ஆகியவற்றைத் தூசி தட்டி திமுகவை எதிர்கொண்டு வருகிறார்.