அய்யோ கொடுமை.. அலறியடித்து ஓடிய உறவினர்கள்.. தூங்கிக் கொண்டிருந்த பாட்டியின் போர்வையில் நுழைந்த ராக்கெட்…” நொடியில் முடிந்த 95 வயது மூதாட்டியின் உயிர்..!!

மத்தியப் பிரதேச மாநிலம் இந்தூரில் நடைபெற்ற ஒரு துயரச் சம்பவத்தில் 95 வயது மூதாட்டி தீ விபத்தில் உயிரிழந்தார். அவர் தனது வீட்டின் இரண்டாவது மாடியில் உள்ளறையில் தூங்கிக்கொண்டிருந்தபோது திடீரென தீ விபத்து ஏற்பட்டு, படுக்கையும் போர்வையும் தீயில் எரிந்தன. பட்டாசு ராக்கெட் ஒன்று அவரது போர்வையில் நுழைந்ததே தீ விபத்துக்குக் காரணம் என்று உறவினர்கள் தெரிவிக்கின்றனர். குடும்பத்தினர் அவரை மீட்டு தீவிர சிகிச்சைக்காக மருத்துவமனைக்குக் கொண்டு சென்றனர்; இருப்பினும் மருத்துவர்களால் அவரைக் காப்பாற்ற முடியவில்லை. இந்தச் சம்பவம் ஹீராநகர் காவல் நிலைய எல்லைக்குட்பட்ட காயத்ரி நகரில் நடந்துள்ளது, இதனால் அப்பகுதியில் சோகம் நிலவுகிறது.

உயிரிழந்தவர் குலாப் பாய் நவ்ரே (95) என அடையாளம் காணப்பட்டுள்ளார். அவர் தனது குடும்பத்தினருடன் காயத்ரி நகரில் வசித்து வந்தார். வீட்டின் இரண்டாவது மாடியில் அவருக்கென தனி அறை ஒதுக்கப்பட்டு அவர் இரவு நேரங்களில் அங்கே தூங்குவது வழக்கம், மற்ற குடும்ப உறுப்பினர்கள் கீழ் தளத்தில் வசித்து வந்தனர். திங்கட்கிழமை நள்ளிரவு 11 மணியளவில் குடும்பத்தினர் கீழே அமர்ந்து உணவு அருந்திக் கொண்டிருந்தபோது வீட்டில் புகை மூட்டம் எழுவதைக் கவனித்தனர். உடனே அவர்கள் மாடிக்குச் சென்று பார்த்தபோது அறையிலிருந்து தீப்பிழம்புகள் வெளியேறிக்கொண்டிருந்தன. உள்ளே படுக்கையும் போர்வையும் தீயில் எரிந்துகொண்டிருந்த நிலையில், குலாப் பாயும் தீயில் சிக்கி பலத்த காயமடைந்திருந்தார்.

அறையில் தீப்பற்றியதைக் கண்ட குடும்பத்தினர் உடனடியாக தீயை அணைக்க முயன்று, எப்படியோ மூதாட்டியை வெளியே மீட்டு மருத்துவமனைக்குக் கொண்டு சென்றனர். மருத்துவர்கள் சிகிச்சை அளித்த போதிலும், உடல் முழுமையாக எரிந்திருந்ததால் அவரது நிலை கவலைக்கிடமாகவே இருந்தது. நள்ளிரவு சுமார் 3 மணியளவில் சிகிச்சை பலனின்றி அவர் உயிரிழந்தார். இதற்கிடையே, ஹீராநகர் காவல் துறையினர் சம்பவ இடத்திற்கு விரைந்து வந்து விசாரணை நடத்தினர். பட்டாசு ராக்கெட் மூலம் தீ விபத்து ஏற்பட்டிருக்கலாம் என்ற கோணத்திலும், மற்ற சாத்தியக்கூறுகள் குறித்தும் காவல்துறையினர் தீவிரமாக விசாரித்து வருகின்றனர். பிரேதப் பரிசோதனை அறிக்கை மற்றும் முழுமையான விசாரணைக்குப் பின்னரே தீ விபத்துக்கான உண்மையான காரணம் தெரியவரும் என்று அதிகாரிகள் தெரிவித்தனர்.