தமிழக அரசியலில் உச்சகட்டப் பரபரப்பு.. அமித் ஷாவுடன் ஆளுநர் அர்லேகர் திடீர் சந்திப்பு.. பின்னணியில் இருக்கும் அந்த 2 சம்பவங்கள்..!!

தமிழக ஆளுநர் ராஜேந்திர விஸ்வநாத் அர்லேகர், மத்திய உள்துறை அமைச்சர் அமித் ஷாவை டெல்லியில் நேரில் சந்தித்துப் பேசியுள்ளார். தமிழக ஆளுநராகப் பொறுப்பேற்ற பிறகு அமித் ஷாவை அவர் சந்திப்பது இதுவே முதல் முறையாகும். நவம்பர் 13-ஆம் தேதி சென்னையிலிருந்து டெல்லி சென்ற ஆளுநர், மாநிலத்தின் சட்டம்-ஒழுங்கு நிலவரம் மற்றும் பாதுகாப்பு விவகாரங்கள் குறித்து மத்திய உள்துறை அமைச்சருடன் முக்கிய ஆலோசனை நடத்தியுள்ளார். குறிப்பாக, தீபாவளி காலகட்டத்தில் நிகழ்ந்த கொலைச் சம்பவங்கள் மற்றும் தேனியில் சிறப்பு காவல் உதவி ஆய்வாளர் கொல்லப்பட்ட சம்பவம் ஆகியவை அரசியல் விவாதங்களை ஏற்படுத்தியுள்ள நிலையில், இது குறித்து மத்திய உள்துறை அமைச்சகம் கேட்டிருந்த அறிக்கையின் அடிப்படையில் இந்தச் சந்திப்பு கூடுதல் முக்கியத்துவம் பெற்றுள்ளது.

இதற்கிடையில், தமிழக முதலமைச்சர் விஜய்யும் மாநிலத்தின் சட்டம்-ஒழுங்கு சூழல் தொடர்பாக காவல்துறை தலைமை இயக்குநர் மகேஷ் குமார் அகர்வால் மற்றும் உளவுத்துறை உயர் அதிகாரிகளுடன் தொடர்ந்து ஆலோசனைகளை நடத்தி வருகிறார். குற்றச் சம்பவங்களைத் தடுப்பது மற்றும் காவல்துறையின் நடவடிக்கைகளைத் தீவிரப்படுத்துவது குறித்து இந்தக் கூட்டங்களில் விவாதிக்கப்பட்டுள்ளது. ஏற்கெனவே கடந்த வாரம் குடியரசுத் தலைவர் திரவுபதி முர்மு, துணைக் குடியரசுத் தலைவர் சி.பி. ராதாகிருஷ்ணன் மற்றும் பிரதமர் நரேந்திர மோடி ஆகியோரை ஆளுநர் சந்தித்திருந்த நிலையில், தற்போது அமித் ஷாவுடனான சந்திப்பு அரசியல் வட்டாரங்களில் பெரும் கவனத்தை ஈர்த்துள்ளது.

அமித் ஷாவுடனான சந்திப்பில் பேசப்பட்ட விவரங்கள் குறித்த அதிகாரப்பூர்வ அறிக்கை இன்னும் வெளியாகாத நிலையில், மத்திய அரசின் அடுத்தகட்ட நடவடிக்கைகள் குறித்த எதிர்பார்ப்பு எழுந்துள்ளது. தனது டெல்லி பயணத்தைத் தொடர்ந்து, நவம்பர் 14-ஆம் தேதி ஜம்மு – காஷ்மீரில் நடைபெறும் தனியார் பல்கலைக்கழகப் பட்டமளிப்பு விழாவில் ஆளுநர் அர்லேகர் பங்கேற்க உள்ளார். அங்குள்ள நிகழ்ச்சிகளை முடித்துக்கொண்டு நவம்பர் 15-ஆம் தேதி அவர் மீண்டும் சென்னை திரும்புவார் எனத் தெரிவிக்கப்பட்டுள்ளது.