“Boom 1.50 pm…” விமானக் கழிப்பறையில் ஒட்டப்பட்டிருந்த அந்த ஒற்றை டிஷ்யூ பேப்பரால் நடுவானில் உறைந்த 192 பயணிகள்.. பரபரப்பு பின்னணி..!!

ஹைதராபாத்திலிருந்து சென்னைக்கு 192 பயணிகளுடன் வந்து கொண்டிருந்த இண்டிகோ விமானத்தின் கழிப்பறையில் ஒட்டப்பட்டிருந்த சிறிய டிஷ்யூ பேப்பரால் நடுவானில் பெரும் பதற்றம் ஏற்பட்டது. கடந்த நவம்பர் 13-ஆம் தேதி மதியம் 12 மணியளவில் புறப்பட்ட அந்த விமானத்தின் கழிப்பறைக் கண்ணாடியில் ‘Boom 1.50 pm’ என எழுதப்பட்டிருந்த காகிதத்தை விமானப் பணியாளர் ஒருவர் பார்த்துள்ளார். குறிப்பிட்ட நேரத்தைக் குறிப்பிட்டு வெடிகுண்டு மிரட்டல் போல இருந்த இந்த வாசகத்தால் அதிர்ச்சியடைந்த அவர், உடனடியாக விமானியிடம் தகவல் தெரிவித்தார். இதையடுத்து, சென்னை விமானப் போக்குவரத்துக் கட்டுப்பாட்டு மையத்தைத் தொடர்பு கொண்ட விமானி, பாதுகாப்பு காரணங்களுக்காக விமானத்தை முன்னுரிமை அடிப்படையில் அவசரமாகத் தரையிறக்க அனுமதி கோரினார்.

தகவலறிந்து உஷாரான சென்னை விமான நிலைய அதிகாரிகள், மதியம் சுமார் 1 மணியளவில் விமானம் தரையிறங்கியதும் அதனைத் தனிமைப்படுத்தப்பட்ட இடத்திற்குக் கொண்டு சென்றனர். தொடர்ந்து, வெடிகுண்டு தடுப்புப் பிரிவினர் மற்றும் பாதுகாப்புப் படையினர் மோப்ப நாய்களுடன் விமானத்திற்குள் நுழைந்து இருக்கைகள், கழிப்பறைகள் மற்றும் பயணிகளின் உடைமைகள் என அனைத்துப் பகுதிகளிலும் தீவிர சோதனை நடத்தினர். சுமார் ஒரு மணி நேரம் நடைபெற்ற இந்தச் சோதனையில் சந்தேகத்திற்குரிய பொருட்கள் எதுவும் சிக்காததால், அது வெறும் புரளி என்பது உறுதி செய்யப்பட்டுப் பயணிகள் வெளியேற அனுமதிக்கப்பட்டனர்.

வெறும் ஒரு சிறிய காகிதம் 192 பயணிகளின் உயிரையும் பயணத்தையும் ஒரு மணி நேரத்திற்கும் மேலாகப் பதற்றத்தில் ஆழ்த்திய இந்தச் சம்பவத்தை அதிகாரிகள் மிகவும் தீவிரமாக எடுத்துக் கொண்டுள்ளனர். விமானத்தில் அச்சத்தை ஏற்படுத்தும் வகையில் மிரட்டல் வாசகம் எழுதி ஒட்டியது யார், அதன் பின்னணி என்ன என்பது குறித்துக் கண்டறிய விமான நிலைய காவல் நிலையத்தில் முறையான புகார் அளிக்கப்பட்டு தீவிர விசாரணை தொடங்கப்பட்டுள்ளது.