“ஆள விடுங்கடா சாமி…” ரூ.25,000 சம்பளத்துக்காக இப்படியொரு டார்ச்சரா..? கடுப்பாகி இண்டர்வியூவிலிருந்து பாதியில் வெளியேறிய பெண்..!!

இன்றைய காலகட்டத்தில் வேலைவாய்ப்பு நேர்காணல் என்பது ஒரு சோதனையாக மாறிவிட்ட நிலையில், 23 வயதுடைய இளம்பெண் ஒருவர் எதிர்கொண்ட பயங்கரமான நேர்காணல் அனுபவம் ரெடிட் தளத்தில் வைரலாகியுள்ளது. ஜூனியர் அனலிஸ்ட் பணிக்காக இரண்டு தொலைபேசி நேர்காணல்களை வெற்றிகரமாக முடித்த அந்தப் பெண், நிறுவனத்தின் அலுவலகத்திற்கு நேரில் சென்றபோது அங்கு பல விசித்திரமான சூழ்நிலைகளைக் கண்டார். அலுவலகத்தில் வரவேற்பாளர் யாரும் இல்லை, சுமார் 100 பேர் வேலை செய்யும் இடமாக இருந்தும் அங்கு சுடுகாடு போன்ற அமைதி நிலவியது போன்ற ஏமாற்றமான சூழலை அவர் எதிர்கொண்டார்.

உள்ளே சென்ற பிறகு உண்மையான அவலங்கள் தொடங்கின; ஜூம் கால் மூலம் இணைந்த மேலாளர்கள் வேண்டுமென்றே ஸ்பானிஷ் மொழியில் பேசி, அந்தப் பெண்ணை விவாதத்திலிருந்து முழுமையாக ஓரங்கட்டினர். அதுமட்டுமின்றி, ஸ்பானிஷ் மொழியமைப்புக் கொண்ட கீபோர்டைக் கொடுத்து ஒரு டாஸ்க் செய்யச் சொல்லிவிட்டு, அதைச் சரியாகச் செய்யத் தவறியதற்காக அவரைத் தாழ்வாகவும் கேலியாகவும் பேசினர். இதற்கெல்லாம் மேலாக, பழைய மேலாளர் மற்றும் இதுவரை எத்தனை இடங்களில் விண்ணப்பித்துள்ளார் என்பது போன்ற அர்த்தமற்ற கேள்விகளைக் கேட்டதுடன், நேர்காணலின் இறுதியில் அவருக்கு ஒரு ஏஐ கோர்ஸை வாங்குமாறும் அறிவுறுத்தினர்.

இவ்வளவு தொல்லைகளுக்குப் பிறகும் மீண்டும் ஒரு பிரசென்டேஷன் செய்யுமாறு நிறுவனத்திலிருந்து மின்னஞ்சல் வந்ததைக் கண்டு கடுப்பான அந்தப் பெண், அற்பமான சம்பளத்திற்காக இத்தகைய மன உளைச்சல்களைச் சகிப்பது முட்டாள்தனம் என்று கருதி அந்த வேலை வாய்ப்பை முற்றிலுமாக நிராகரித்தார். அவரது இந்த தைரியமான முடிவை ரெடிட் பயனர்கள் வெகுவாகப் பாராட்டியதுடன், எந்தவொரு சூழ்நிலையிலும் சுயமரியாதையை விட வேலை பெரிதல்ல என்று கூறி அவருக்கு ஆதரவு தெரிவித்தனர்.