“முதல்ல கேக்க சாப்பிடுவோம்.. அப்புறமா கொள்ளையடிப்போம்..” பூட்டிய வீட்டின் கம்பியை அறுத்து உள்ளே நுழைந்த திருடர்கள்.. 40 நிமிடங்கள் செய்த அக்கிரமம்..!!

மேற்கு வங்கத்தின் தென் 24 பர்கானா மாவட்டம் நரேந்திரபூர் பகுதியில் உள்ள பர்தாபாத் பகுதியில் மிகவும் அதிர்ச்சியூட்டும் மற்றும் விசித்திரமான திருட்டுச் சம்பவம் ஒன்று நடந்துள்ளது. பூட்டியிருந்த வீட்டின் கம்பிகளை அறுத்து உள்ளே நுழைந்த திருடர்கள், லட்சக்கணக்கில் மதிப்புள்ள பொருட்களைக் கொள்ளையடித்ததுடன், திருட்டுக்குப் பிறகு அமைதியாகப் பிரிட்ஜைத் திறந்து அதில் இருந்த பிறந்தநாள் கேக்கையும் சாப்பிட்டுள்ளனர். இந்த முழுச் சம்பவமும் வீட்டில் பொருத்தப்பட்டிருந்த சிசிடிவி கேமராவில் பதிவாகியுள்ளது. இதன் அடிப்படையில் காவல்துறையினர் தீவிர விசாரணை நடத்தி வருகின்றனர்.

காவல்துறையில் அளிக்கப்பட்ட புகாரின்படி, இந்தச் சம்பவம் இரவு 8 மணி முதல் 8:40 மணிக்குள் நடந்துள்ளது. பர்தாபாத் பகுதியைச் சேர்ந்த பிரித்விராஜ் என்பவர் தனது குடும்பத்தினருடன் வெளியே சென்றிருந்தார். அவர்கள் வீடு திரும்பியபோது, ​​வீட்டின் கதவு திறந்திருப்பதைக் கண்டு உள்ளே சென்று பார்த்தபோது, ​​ஜன்னல் கம்பிகள் அறுக்கப்பட்டு திருடர்கள் உள்ளே நுழைந்தது தெரியவந்தது. திருடர்கள் அங்கிருந்து 5 லட்சத்திற்கும் அதிகமான ரூபாய் ரொக்கம், விலைமதிப்பான ரத்தினங்கள், வெளிநாட்டு டாலர்கள் மற்றும் பிறந்தநாளுக்கு பரிசாகக் கிடைத்த பொருட்களைத் திருடிச் சென்றுள்ளனர். அதுமட்டுமின்றி, வீட்டில் வைக்கப்பட்டிருந்த ராதா-கிருஷ்ணர் சிலையைக் தங்கச் சிலை என நினைத்து, அதன் ஆடைகளைக் கிழித்து தரையில் தேய்த்துப் பரிசோதித்துப் பார்த்துள்ளனர்.

வெளியான சிசிடிவி காட்சிகளின்படி, வீட்டிற்குள் நுழைந்த திருடர்கள் நேராக பிரிட்ஜிற்குச் சென்று அதில் வைக்கப்பட்டிருந்த பிறந்தநாள் கேக்கை எடுத்துச் சாப்பிட்டுள்ளனர். அதன்பிறகு, சுமார் 40 நிமிடங்கள் ஒவ்வொரு அறையாகத் தேடி, பீரோவில் வைக்கப்பட்டிருந்த விலைமதிப்பான பொருட்களைத் திருடிக்கொண்டு வீட்டின் பிரதான கதவு வழியாகத் தப்பியோடியுள்ளனர். இச்சம்பவம் குறித்துத் தகவல் அறிந்ததும் காவல்துறையினர் சம்பவ இடத்திற்கு விரைந்து வந்து, சிசிடிவி காட்சிகளின் அடிப்படையில் குற்றவாளிகளை அடையாளம் காணும் பணியில் ஈடுபட்டுள்ளனர்.