BREAKING: “பிரியமுடன், ச. ஜோசப் விஜய்” காலையிலேயே பெற்றோர்களுக்கு பறந்த மெசேஜ்.. தமிழகம் முழுவதும் கொண்டாட்டத்தில் மாணவர்கள்..!!

தமிழகத்தில் அரசு மற்றும் அரசு உதவி பெறும் பள்ளிகளில் பயிலும் மாணவர்களின் ஊட்டச்சத்து குறைபாட்டைப் போக்கவும், வருகைப் பதிவை அதிகரித்து தடையற்ற கல்வியை உறுதி செய்யவும் கொண்டு வரப்பட்ட காலை உணவுத் திட்டம் கல்வித் துறையின் முக்கிய மைல்கல்லாகும். த.வெ.க ஆட்சியில் இத்திட்டம் ‘பெருந்தலைவர் காமராஜர் காலை உணவுத் திட்டம்’ எனப் பெயர் மாற்றப்பட்டுத் தொடர்ந்து வெற்றிகரமாகச் செயல்படுத்தப்பட்டு வருகிறது.

இத்திட்டத்தின் அடுத்தகட்ட வளர்ச்சியாக, 6 முதல் 8-ஆம் வகுப்பு வரை பயிலும் நடுநிலைப்பள்ளி மாணவர்களுக்கும் இக்காலை உணவுத் திட்டம் தற்போது அதிகாரப்பூர்வமாக விரிவுபடுத்தப்பட்டுள்ளது. சென்னை திருவான்மியூரில் உள்ள மாநகராட்சி நடுநிலைப்பள்ளியில் நடைபெற்ற விழாவில், தமிழ்நாடு முதலமைச்சர் ச. ஜோசப் விஜய் இத்திட்ட விரிவாக்கத்தைத் தொடங்கி வைத்துள்ளார். இப்புதிய விரிவாக்கப் பணிகளுக்காக அரசு சார்பில் கூடுதலாக ரூ.217.63 கோடி நிதி ஒதுக்கீடு செய்யப்பட்டுள்ளது.

இந்த விரிவுபடுத்தப்பட்ட திட்டத்தின் மூலம் புதிதாகச் சுமார் 15 லட்சம் மாணவ, மாணவிகள் பயன்பெற உள்ளதாகத் தெரிவிக்கப்பட்டுள்ளது. இதன் மூலம் மாநிலம் முழுவதும் உள்ள 44,984 அரசு மற்றும் அரசு உதவி பெறும் பள்ளிகளைச் சேர்ந்த மொத்தம் 34 லட்சத்து 64 ஆயிரம் மாணவர்கள் தினசரி சத்தான காலை உணவைப் பெற்றுப் பயன்பெறுவர். இடைத்தேர்தல் நடைபெறவுள்ள மதுராந்தகம் மற்றும் தாராபுரம் ஆகிய தொகுதிகளைத் தவிர்த்து மற்ற அனைத்து மாவட்டங்களிலும் இத்திட்டம் முழுவீச்சில் நடைமுறைக்கு வந்துள்ளது.

இதனை முன்னிட்டு முதலமைச்சர் ச. ஜோசப் விஜய் மாணவர்களின் பெற்றோர்களுக்கு அனுப்பிய நெகிழ்ச்சியான குறுஞ்செய்தி சமூக வலைத்தளங்களில் வைரலாகி வருகிறது. அதில், “குழந்தைகள் உற்சாகத்துடன் பள்ளிக்கு வருகைபுரிந்து, சிறப்பாகக் கல்வி கற்பதற்கு ஏதுவாகச் சத்தான, சுவையான காலை உணவு 22.9.2026 (செவ்வாய்க்கிழமை) முதல் வழங்கப்படும் என்பதை மகிழ்ச்சியுடன் தெரிவித்துக் கொள்கிறேன்” என்று குறிப்பிட்டு, “பிரியமுடன், ச. ஜோசப் விஜய், தமிழ்நாடு முதலமைச்சர்” என அவர் நிறைவு செய்துள்ளார். இச்செய்தி பள்ளி மாணவர்களின் பெற்றோர் மத்தியிலும் பொதுமக்கள் மத்தியிலும் தற்போது பெரும் வரவேற்பைப் பெற்றுள்ளது.