“3 பொம்பள பிள்ளைய எப்படி கரையேத்துவேன்” ஊரெல்லாம் ஒரே கடன்… பயிரெல்லாம் கருகிப்போச்சு… விவசாயி எடுத்த சோகமாக முடிவு.. குடும்பத்தினர் அதிர்ச்சி..!!

மகாராஷ்டிர மாநிலம் மரத்வாடா பிராந்தியத்தில் நிலவும் கடும் வறட்சி மற்றும் கடன் சுமை காரணமாக நிலங்கா தாலுகாவைச் சேர்ந்த அமோல் முகலே (41) என்ற விவசாயி தற்கொலை செய்து கொண்டுள்ளார். பயிர்கள் காய்ந்து கருகியதாலும், வங்கி மற்றும் உள்ளூர் கந்துவட்டிக்காரர்களின் கடன் சுமை அதிகரித்ததாலும், தனது மூன்று மகள்களின் எதிர்காலம் மற்றும் குடும்பப் பராமரிப்பு குறித்த கவலையில் அவர் இந்த முடிவை எடுத்துள்ளார். இச்சம்பவம் தொடர்பாகப் போலிஸார் வழக்குப் பதிவு செய்து விசாரணை நடத்தி வருகின்றனர்.

மகாராஷ்டிராவில் சுமார் 80 சதவீத தாலுகாக்கள் கடுமையான வறட்சியால் பாதிக்கப்பட்டுள்ளன. குறிப்பாக மரத்வாடா பகுதியில் நீராதாரங்கள் முற்றிலும் வற்றிப்போயுள்ளன. அங்குள்ள 78 சிறிய நீர்ப்பாசனத் திட்டங்கள் முற்றிலும் காய்ந்துவிட்டன; 4 நடுத்தரக் குளங்களில் ஒரு சொட்டு நீர் கூட இல்லை. நடுத்தர மற்றும் சிறிய நீர்ப்பாசனத் திட்டங்களின் சராசரி நீர் இருப்பு 19 சதவீதமாகக் குறைந்துள்ளது. லாத்தூர் மற்றும் தார்சிவ் மாவட்டங்களில் நிலைமை மிகவும் மோசமாக உள்ளது.

இப்பகுதியில் உள்ள 215 அணைகளில் நீர் இருப்பு 25 சதவீதத்திற்கும் குறைவாகவே உள்ளது. ஜால்னா மாவட்டத்தின் கலஹாட்டி திட்ட நீர் ஆதாரம் முற்றிலும் காய்ந்துவிட்டதால், 15 முதல் 20 கிராமங்களில் குடிநீருக்கும், கால்நடைகளுக்கான தண்ணீருக்கும் கடும் தட்டுப்பாடு ஏற்பட்டுள்ளது. வறட்சியால் வாழ்வாதாரத்தை இழந்து தவிக்கும் விவசாயிகளுக்கு அரசு விரைந்து நிவாரண உதவிகளை வழங்க வேண்டும் என்ற கோரிக்கை வலுத்துள்ளது.