சாப்பிடச் சென்ற இடத்தில் பயங்கரம்..! நடுரோட்டில் காதல் மனைவியை அரிவாளால் வெட்டி, ஆசிட் வீசிய கணவர்.. பதறவைக்கும் பின்னணி..!!

மேற்கு வங்கத்தைச் சேர்ந்த 26 வயது இளம்பெண்ணான மதுமிதா, கடந்த ஒன்றரை ஆண்டுகளாக ஒரு தனியார் கிளினிக்கில் செவிலியராக பணியாற்றி வருகிறார். இவருக்கும் தமிழ்நாட்டின் மதுரையைச் சேர்ந்த வெங்கடேஷ் என்ற எண்ணெய் நிறுவன ஊழியருக்கும் கடந்த 2023-ம் ஆண்டு திருமணம் நடந்துள்ளது. ஆனால், தம்பதியிடையே ஏற்பட்ட தனிப்பட்ட கருத்து வேறுபாடுகள் காரணமாக, கடந்த ஓராண்டாக இருவரும் ஒருவரையொருவர் பிரிந்து தனித்தனியாக வசித்து வந்துள்ளனர்.

இந்நிலையில், வியாழக்கிழமை காலை சுமார் 9:15 மணியளவில் மதுமிதா காலை உணவு சாப்பிடுவதற்காகத் தான் வேலை செய்யும் கிளினிக்கில் இருந்து வெளியே வந்துள்ளார். அப்போது, ஏற்கனவே இருசக்கர வாகனத்தில் கத்தி, அரிவாள் மற்றும் ஆசிட் போன்ற பயங்கர ஆயுதங்களுடன் அங்கு வந்து மறைந்திருந்த கணவர் வெங்கடேஷ், மதுமிதாவை வழிமறித்துப் பின்தொடர்ந்துள்ளார். மதுமிதா பயந்துபோய் அங்கிருந்து தப்பிக்க முயன்றபோது, கிளினிக்கின் வாகன நிறுத்துமிட பகுதி வரை துரத்திச் சென்று, தான் கொண்டு வந்திருந்த அரிவாளால் அவரை கொடூரமாக வெட்டியதோடு, தரையை சுத்தம் செய்யப் பயன்படுத்தும் அமிலத்தையும் அவர் மீது வீசித் தாக்கியுள்ளார்.

மதுமிதாவின் அலறல் சத்தம் கேட்டு ஓடிவந்த பொதுமக்கள் மற்றும் கிளினிக் ஊழியர்கள் வெங்கடேஷைத் தடுக்க முயன்றபோது, அவர் அவர்களையும் தாக்க முற்பட்டுள்ளார். அப்போது அருகில் போக்குவரத்து பணியில் இருந்த போலீஸ் அதிகாரி உடனடியாகச் சம்பவ இடத்திற்கு விரைந்து வந்து தலையிட்டதால், தப்பியோட முயன்ற வெங்கடேஷ் கையும் களவுமாகப் பிடிக்கப்பட்டு கைது செய்யப்பட்டார். இந்த கொடூரத் தாக்குதலில் பலத்த காயமடைந்து உயிருக்கு ஆபத்தான நிலையில் இருக்கும் மதுமிதா, தற்போது மருத்துவமனையில் தீவிர சிகிச்சைப் பிரிவில் அனுமதிக்கப்பட்டுத் தொடர்ந்து கண்காணிக்கப்பட்டு வருகிறார்.