“உயிர காப்பாத்த முடியலையே” ஐஐடி விடுதி அறையில் பி.டெக் மாணவர் தூக்கிட்டு தற்கொலை… நள்ளிரவில் மாணவர்கள் போராட்டம்… பெரும் பரபரப்பு..!!

ஜார்க்கண்ட் மாநிலம் ராஞ்சியின் கேல்காவ்ன் பகுதியில் உள்ள புகழ்பெற்ற ஐஐடி நிறுவன விடுதியில், பி.டெக் முதலாமாண்டு படித்து வந்த ஆதித்யா என்ற மாணவர் தனது அறையில் தூக்கிட்டு தற்கொலை செய்து கொண்ட சம்பவம் பெரும் அதிர்ச்சியை ஏற்படுத்தியுள்ளது. பீகார் மாநிலம் பூர்ணியா மாவட்டத்தைச் சேர்ந்த இவர், சனிக்கிழமை இரவு நீண்ட நேரமாகியும் அறையைத் திறக்காததால் சந்தேகமடைந்த நண்பர்கள் கதவை உடைத்து உள்ளே சென்றனர். அங்கு ஆதித்யா தூக்கில் தொங்குவதைக் கண்டு நிலைகுலைந்த மாணவர்கள், அவரை உடனடியாக மீட்டு அருகில் உள்ள தனியார் மருத்துவமனைக்குக் கொண்டு சென்றனர். ஆனால், அவரைப் பரிசோதித்த மருத்துவர்கள் அவர் ஏற்கனவே இறந்துவிட்டதாக அறிவித்தனர்.

மாணவனின் மரணச் செய்தி பரவியதைத் தொடர்ந்து, விடுதியில் தங்கியிருந்த நூற்றுக்கணக்கான மாணவர்கள் நள்ளிரவிலேயே ஒன்று திரண்டு கல்லூரி நிர்வாகத்திற்கு எதிராகத் தீவிரப் போராட்டத்தில் ஈடுபட்டனர். கல்வி வளாகத்திற்குள் அவசர மருத்துவ வசதிகளும், தகுந்த முதலுதவி ஏற்பாடுகளும் இல்லாததே இந்த உயிரிழப்பிற்கு முக்கியக் காரணம் என்று மாணவர்கள் குற்றம் சாட்டினர். உரிய நேரத்தில் முதலுதவி கிடைத்து, தாமதமின்றி மருத்துவமனைக்கு அழைத்துச் சென்றிருந்தால் தங்களது நண்பனின் உயிரைக் காப்பாற்றியிருக்கலாம் என்று கூறி அவர்கள் தங்களின் ஆவேசத்தை வெளிப்படுத்தினர்.

இச்சம்பவம் குறித்து தகவலறிந்த கேல்காவ்ன் போலீசார் மற்றும் தடயவியல் துறையினர் விரைந்து வந்து ஆதித்யாவின் அறையைச் சீல் வைத்து, உடலைக் கைப்பற்றி பிரேதப் பரிசோதனைக்கு அனுப்பினர். தற்கொலைக்கான காரணம் குறித்து கடிதம் எதுவும் கிடைக்காததால், கல்வி மன அழுத்தம் அல்லது குடும்பப் பிரச்சினைகள் ஏதேனும் காரணமா என்ற கோணத்தில் போலீசார் தீவிர விசாரணை நடத்தி வருகின்றனர். ராஞ்சியில் உள்ள கல்வி நிறுவன விடுதிகளில் ஒரே வாரத்திற்குள் நடக்கும் இரண்டாவது சந்தேகத்திற்கிடமான மரணம் இது என்பதால் மாணவர்களிடையே பெரும் அச்சமும் பரபரப்பும் நிலவுகிறது.