முதலமைச்சர் காரை மறித்து மதுபாட்டில், முட்டை, தக்காளி.. பஞ்சாபில் பாஜக தலைவர் அதிரடி கைதால் பரபரப்பு..!

பஞ்சாப் முதலமைச்சர் பகவந்த் மான் பங்கேற்ற நிகழ்ச்சி ஒன்றில் மதுபான பாட்டில், முட்டைகள் மற்றும் தக்காளிகளுடன் நுழைந்து பரபரப்பை ஏற்படுத்திய முன்னாள் மத்திய அமைச்சரும், பாஜக தலைவருமான ரவ்னீத் சிங் பிட்டுவை பஞ்சாப் காவல்துறை கைது செய்துள்ளது. பஞ்சாப் வேளாண் பல்கலைக்கழகத்தில் நடைபெற்ற ‘கிசான் மேளா’ என்ற விவசாய திருவிழாவில் பங்கேற்க முதலமைச்சர் வந்தபோது, அதன் நுழைவாயிலில் தனது ஆதரவாளர்களுடன் பிட்டு இந்த அதிரடி போராட்டத்தில் ஈடுபட்டார். முதலமைச்சரின் வாகன அணிவகுப்பு அந்த இடத்தை கடந்தபோது, அவரை நோக்கி மது பாட்டிலை உயர்த்திக் காட்டி பிட்டு அமளியில் ஈடுபட்டார்.

முன்னதாக, நேற்று பாஜக நடத்திய ‘போதை இல்லாத பஞ்சாப் யாத்திரை’யின் போது பிட்டுவின் வாகன அணிவகுப்பு மீது சிலரால் முட்டைகளும் தக்காளிகளும் வீசி தாக்குதல் நடத்தப்பட்டது. இந்தத் தாக்குதலுக்குப் பின்னால் முதலமைச்சர் பகவந்த் மானின் அரசு இருப்பதாகக் குற்றம் சாட்டிய பிட்டு, தங்களுக்கு வீசப்பட்ட முட்டைகளையும் தக்காளிகளையும் முதலமைச்சரிடமே திருப்பிக் கொடுப்பதற்காக இன்று வந்ததாகக் கூறினார்.

மேலும், டெல்லியில் அரவிந்த் கெஜ்ரிவால் அமர்ந்துகொண்டு பஞ்சாபைக் கொள்ளையடித்துக் கொண்டிருக்கும் வேளையில், முதலமைச்சர் பகவந்த் மான் இந்த மதுவை அருந்தி மகிழ வேண்டும் என்று அவர் மிகக் கடுமையான எள்ளலுடன் விமர்சித்தார். தம்மைக் கைது செய்வதாலோ அல்லது வழக்குகள் போடுவதாலோ மக்களின் குரலை ஒருபோதும் அடக்கிவிட முடியாது என்றும் பிட்டு தனது முகநூல் பக்கத்தில் பதிவிட்டுள்ளார்.