“சேரியில்லா ஊருக்குள்ள பொறக்க வேணும் பேரப்புள்ள..!” சட்டமன்றத்தில் விஜய் படப் பாட்டைப் பாடிய அமைச்சர் வன்னி அரசு.. கோட்டையில் அனல் பறந்த விவாதம்..!!!

சாதி ஒழிப்பு குறித்துப் பேசிய அமைச்சர் வன்னி அரசு, தற்போதைய முதலமைச்சர் விஜய் நடிப்பில் வெளியான ‘போக்கிரி’ திரைப்படத்தின் பாடல் வரிகளைக் குறிப்பிட்டுப் பேசியுள்ளது அரசியல் மற்றும் சமூக ஊடக வட்டாரங்களில் பெரும் விவாதப் பொருளாக மாறியுள்ளது. தமிழகப் பேரவையில் சாதி ஒழிப்பு மற்றும் சமூக நீதி குறித்து உரையாற்றிய அவர், பாரதியார், பாரதிதாசன், பேரறிஞர் அண்ணா மற்றும் கலைஞர் கருணாநிதி போன்ற ஆளுமைகளின் சாதி ஒழிப்பு சார்ந்த வரலாற்றுச் சிறப்புமிக்க வரிகளை மேற்கோள் காட்டினார். அந்த வரிசையில், கவிஞர் கபிலன் எழுதி முதலமைச்சர் விஜய் தனது திரைப்படத்தில் பாடி நடித்த ‘சேரியில்லா ஊருக்குள்ள பொறக்க வேணும் பேரப்புள்ள’ என்ற புகழ்பெற்ற பாடல் வரிகளையும் சாதி ஒழிப்புக்கு எதிரான குரலாக இதில் தான் சேர்த்துக் கொள்வதாக வன்னி அரசு பேரவையில் பகிரங்கமாகத் தெரிவித்தார்.

ஆளுங்கட்சியின் தலைவரான முதலமைச்சர் விஜய்யின் பழைய திரைப்படப் பாடல் வரிகளை, சாதி ஒழிப்புப் போராட்டக் கருத்துக்களுடன் ஒப்பிட்டு வன்னி அரசு பேசியுள்ளது அரசியல் அரங்கில் ஒரு தந்திரமான மற்றும் முற்போக்கான நகர்வாகப் பார்க்கப்படுகிறது. தற்போது ஆட்சிப் பொறுப்பில் இருக்கும் முதலமைச்சரின் கடந்த காலக் கலைப்படைப்புகள் வழியே அவரது சமூகப் பொறுப்பை நினைவூட்டும் விதமாக இந்த உரை அமைந்துள்ளது