“லுங்கியால் கட்டிவைத்து கொடூர அடி” நாகர்கோவில் சிறைக்கைதி சபரிவர்மன் அடித்தே கொலை… சிபிசிஐடி குற்றப்பத்திரிகையில் நெஞ்சை உலுக்கும் பகீர் உண்மைகள்..!

நாகர்கோவில் கிளைச் சிறையில் கைதி சபரிவர்மன் அடித்தே கொலை செய்யப்பட்டதாக சிபிசிஐடி (CBCID) தாக்கல் செய்துள்ள குற்றப்பத்திரிகையில் அதிரடித் தகவல் வெளியாகியுள்ளது. சபரிவர்மனை சிறை வார்டன்கள், அங்குள்ள சக கைதிகளை வைத்தே கொடூரமாகத் தாக்கியுள்ளனர் என்றும், அந்தத் தாக்குதலால்தான் அவரது மரணம் ஏற்பட்டுள்ளது என்றும் சிபிசிஐடி தனது விசாரணையில் உறுதி செய்துள்ளது.

தாக்குதலின் போது சபரிவர்மனின் பையிலிருந்த அவருடைய லுங்கியைக் கொண்டே அவரைச் சிறைக்குள் கட்டி வைத்துச் சிறை வார்டன்கள் மிகக் கடுமையாகத் தாக்கியுள்ளனர். மேலும், அடித்து முடித்த பிறகும் கூட அவரது உடலில் கட்டப்பட்டிருந்த கட்டுகளை அவர்கள் அவிழ்க்காமல் அப்படியே விட்டுச் சென்றுள்ளனர் என்ற அதிர்ச்சியூட்டும் உண்மை அம்பலமாகியுள்ளது.

இவ்வாறு கட்டுகளால் நீண்ட நேரம் அசைய முடியாமல் சிறைத் தரையிலேயே கிடந்த சபரிவர்மனுக்கு, மூச்சுத் திணறல் ஏற்பட்டு நள்ளிரவிலேயே அவர் பரிதாபமாக உயிரிழந்துள்ளார். சிறைத்துறையினரின் இந்த அராஜகப் போக்கையும், கொடூரக் கொலையையும் சிபிசிஐடி ஆதாரங்களுடன் நீதிமன்றத்தில் சமர்ப்பித்துள்ள குற்றப்பத்திரிகை தமிழகத்தில் பெரும் பரபரப்பை ஏற்படுத்தியுள்ளது.