ஐயோ கடவுளே.. டிரெட்மில்லில் ஓடிக்கொண்டிருந்தபோதே சுருண்டு விழுந்த பள்ளி முதல்வர்.. ஜிம்மில் நேர்ந்த விபரீதம்.. நெஞ்சை பதறவைக்கும் சிசிடிவி காட்சி..!!

ராஜஸ்தான் மாநிலம் சுரு மாவட்டம், சர்தார்ஷஹாரில் உள்ள உடற்பயிற்சிக் கூடத்தில் டிரெட்மில்லில் ஓடிக்கொண்டிருந்த அரசுப் பள்ளி முதல்வர் ஒருவர் திடீரென நிலைதடுமாறி கீழே விழுந்து உயிரிழந்தார். அஸ்பால்சர் கிராமத்தில் உள்ள அரசு மேல்நிலைப் பள்ளியில் முதல்வராகப் பணியாற்றி வந்த 49 வயதான பிர்பல்ராம் மேக்வால், செவ்வாய்க்கிழமை மாலை உடற்பயிற்சி செய்துகொண்டிருந்தபோது இந்த விபத்து நேரிட்டது. அவர் கால்தவறி கீழே விழுந்ததில் தலையில் பலத்த காயம் ஏற்பட்டது. உடற்பயிற்சிக் கூடத்தில் இருந்தவர்கள் உடனடியாக அவரை மீட்டு அரசு மருத்துவமனைக்குக் கொண்டு சென்ற போதிலும், அவர் ஏற்கனவே இறந்துவிட்டதாக மருத்துவர்கள் அறிவித்தனர்.

இந்தத் துயரமான சம்பவத்தின் சிசிடிவி காணொளி தற்போது வெளியாகி அப்பகுதியில் பெரும் விவாதப் பொருளாகியுள்ளது. அந்த வீடியோவில், முதல்வர் பிர்பல்ராம் டிரெட்மில்லில் ஓடிக்கொண்டிருக்கும்போது திடீரென நிலைதடுமாறி பின்னோக்கி விழுவதும், அருகில் இருந்தவர்கள் பதறியடித்துக்கொண்டு அவருக்கு உதவ ஓடிவருவதும் பதிவாகியுள்ளது. இந்த விபத்து குறித்து சர்தார்ஷஹர் காவல்துறையினர் வழக்குப்பதிவு செய்து விசாரணையைத் தொடங்கியுள்ளனர்.

முதல்வர் பிர்பல்ராமின் திடீர் மரணத்திற்கு மாரடைப்பு காரணமாக இருக்கலாம் என உள்ளூர் மக்கள் சந்தேகித்த போதிலும், மரணத்திற்கான அதிகாரப்பூர்வ காரணம் இன்னும் உறுதி செய்யப்படவில்லை. குடும்பத்தினரின் முன்னிலையில் பிரேதப் பரிசோதனை செய்யப்பட்டு, அவரது உடல் உறவினர்களிடம் ஒப்படைக்கப்பட்டுள்ளது. பிரேதப் பரிசோதனை அறிக்கை வந்த பிறகே மரணத்திற்கான உண்மையான காரணம் என்ன என்பது முழுமையாகத் தெரியவரும் என காவல்துறையினர் தெரிவித்துள்ளனர்.