காவிரி தொடர்பாக கர்நாடக அரசுடன் பேச்சுவார்த்தைக்கு போனால்… என்ன நடக்கும் தெரியுமா..? முதல்வர் விஜய்க்கு சீமான் பகிரங்க எச்சரிக்கை..!!

காவிரி விவகாரம் தொடர்பாகக் கர்நாடகாவிற்குச் சென்று பேச்சுவார்த்தை நடத்த முயலும் தமிழக முதலமைச்சர் விஜய்யின் முடிவிற்கு நாம் தமிழர் கட்சியின் தலைமை ஒருங்கிணைப்பாளர் சீமான் கடும் கண்டனம் தெரிவித்துள்ளார். பேச்சுவார்த்தை என்ற பெயரில் அண்டை மாநிலத்திற்கு நேரில் சென்று பேசுவது, தமிழகத்தின் உரிமைகளை முழுமையாகத் தாரைவார்க்கும் ஒரு பெரும் துரோகம் என்று அவர் சாடியுள்ளார். மேலும், தமிழகத்தின் பக்கமிருக்கும் சட்டப்பூர்வ நியாயங்களையும், உரிமைகளையும் பறிகொடுக்கத் துடிக்கும் தமிழக வெற்றிக் கழக அரசின் இந்த அணுகுமுறை வன்மையாகக் கண்டிக்கத்தக்கது என்றும் அவர் தனது அறிக்கையில் குறிப்பிட்டுள்ளார்.

உச்ச நீதிமன்றத் தீர்ப்பின்படி தமிழகத்திற்குத் தர வேண்டிய தண்ணீரைத் தராமல் ஏமாற்றி வரும் கர்நாடக அரசுடன், மீண்டும் பேச்சுவார்த்தை மேசைக்குச் செல்வது என்பது தமிழகத்திற்கு ஆபத்தாய் முடியும் என சீமான் எச்சரித்துள்ளார். ஏற்கனவே சட்ட ரீதியாகப் போராடிப் பெற்ற உரிமைகளை இத்தகைய பேச்சுவார்த்தைகள் பலவீனப்படுத்திவிடும் என்றும், இது கர்நாடகாவின் பிடிவாத போக்கிற்குத் தமிழக அரசே வழிவகுத்துக் கொடுப்பது போலாகிவிடும் என்றும் அவர் சுட்டிக்காட்டியுள்ளார்.

நடுவர் மன்ற மற்றும் உச்ச நீதிமன்றத் தீர்ப்புகளைச் செயல்படுத்தக் கோரி மத்திய அரசிற்கு அழுத்தம் கொடுப்பதே முறையான வழிமுறையாக இருக்கும் என்று கூறியுள்ள அவர், அதனை விடுத்து முதலமைச்சர் விஜய் மீறிப் பேச்சுவார்த்தை நடத்த முயன்றால், அவர் வரலாற்றுப் பழியைச் சுமக்க நேரிடும் என்று தனது அறிக்கையின் வாயிலாகத் தவெக அரசிற்கு எச்சரிக்கை விடுத்துள்ளார்.