அண்ணே வேண்டாம்..! பொதுத்தேர்தலிலேயே டெபாசிட் காலி… இடைத்தேர்தலில் நிக்கணுமா..? பயத்தில் நாதக தம்பிகள்… சீமான் எடுக்கப்போகும் முடிவு என்ன.?

மதுராந்தகம் மற்றும் தாராபுரம் ஆகிய சட்டமன்றத் தொகுதிகளின் இடைத்தேர்தலில் நாம் தமிழர் கட்சி போட்டியிடுவதில் அக்கட்சியின் முக்கிய நிர்வாகிகளிடையே தயக்கமும் சலனமும் ஏற்பட்டுள்ளதாகக் கூறப்படுகிறது. வழக்கமாக எந்தவொரு தேர்தல் அறிவிப்பு வந்தவுடனேயே வேட்பாளர்களை முன்கூட்டியே அறிவிக்கும் வழக்கம் கொண்ட நாதக, இம்முறை திமுக மற்றும் தவெக போன்ற கட்சிகள் ஏற்கனவே வேட்பாளர்களை அறிவித்துத் தேர்தல் களம் கண்டுள்ள நிலையிலும் இன்னமும் தனது நிலையை வெளிப்படையாக அறிவிக்காமல் தாமதித்து வருகிறது.

வரும் அக்டோபர் 6-ஆம் தேதி நடைபெறவுள்ள இந்த இடைத்தேர்தலில் நாதக கண்டிப்பாகக் களமிறங்க வேண்டும் என்பதில் கட்சியின் ஒருங்கிணைப்பாளர் சீமான் உறுதியாக இருப்பதாகத் தெரிகிறது. ஆனால், கட்சியின் மூத்த நிர்வாகிகளோ தற்போதைக்குத் தேர்தலில் போட்டியிடுவதை விடக் கட்சியின் உட்கட்டமைப்பு மற்றும் மறுசீரமைப்புப் பணிகளில் கவனம் செலுத்துவதே சிறந்தது என்ற கருத்தைக் கொண்டுள்ளனர். கடந்த பொதுத்தேர்தலில் இந்த இரு தொகுதிகளிலும் கட்சிக்குப் போதுமான வாக்குகள் கிடைக்காத சூழலில், மீண்டும் போட்டியிடுவது சரியான உத்தியாக இருக்காது எனக் கருதுகின்றனர்.

குறிப்பாக, பொதுத்தேர்தலிலேயே டெபாசிட்டை இழக்க நேரிட்ட நிலையில், தற்போதைய இடைத்தேர்தலிலும் தோல்வியைத் தழுவினால் அது தொண்டர்கள் மற்றும் நிர்வாகிகள் மத்தியில் கடுமையான மனச்சோர்வை உண்டாக்கும் என்று மூத்த நிர்வாகிகள் அஞ்சுகின்றனர். மேலும், இடைத்தேர்தல் களத்தில் அதிக அளவிலான பணச்செலவும் உழைப்பும் தேவைப்படும் என்பதால், அதனை உடனடியாகத் தாங்குவது கடினம் என்ற காரணத்தைச் சுட்டிக்காட்டித் தேர்தலைப் புறக்கணிக்கலாம் அல்லது பிற கட்சிகளுக்கு ஆதரவு தெரிவிக்கலாம் என்ற ஆலோசனைகளையும் முன்வைத்து வருகின்றனர்.

இருப்பினும், சீமானுக்கு நெருக்கமான நிர்வாகிகள் சிலர் “நாம் நிச்சயம் களமிறங்குகிறோம், அதற்கான முதற்கட்டப் பணிகளைத் தொடங்குங்கள்” என்று அறிவுறுத்தி வருவதால் கட்சியின் களப் பணியாளர்கள் குழப்பத்தில் ஆழ்ந்துள்ளனர். தலைமைக்கும் மூத்த நிர்வாகிகளுக்கும் இடையே நிலவும் இந்த முரண்பாடான நிலைப்பாட்டால், நாதக இந்த இடைத்தேர்தலில் களமிறங்குமா அல்லது விலகி நிற்குமா என்ற எதிர்பார்ப்பு அரசியல் வட்டாரத்தில் மேலோங்கியுள்ளது.