“45, 60, 70..” ஸ்டாலின் போட்ட புதிய கணக்கு.. திமுக நிர்வாகிகளுக்குள் வெடித்த பரபரப்பு.. ஆட்டம் காணும் சீனியர்களின் நாற்காலிகள்..!!

திமுக செயற்குழு கூட்டத்தில் கட்சியின் பல்வேறு மட்டத்திலான பதவிகளுக்கு அதிரடியாக வயது உச்ச வரம்பு நிர்ணயிக்கப்பட்டு வரலாற்றுச் சிறப்புமிக்க தீர்மானம் நிறைவேற்றப்பட்டுள்ளது. இந்த புதிய விதிமுறையின்படி, கட்சியின் மிக முக்கியப் பொறுப்பான மாவட்டச் செயலாளர்கள் பதவிக்கு 70 வயது உச்ச வரம்பாக நிர்ணயிக்கப்பட்டுள்ளது. இதேபோல, ஒன்றியச் செயலாளர்கள் பதவிக்கு 60 வயதும், அடிமட்ட அமைப்பான கிளைச் செயலாளர்கள் பதவிக்கு 45 வயதும் அதிகபட்ச வயது வரம்பாகக் கொண்டுவரப்பட்டுள்ளது. இதன் மூலம் மூத்த நிர்வாகிகளின் வழிகாட்டுதலோடு, இளைஞர்களுக்குக் கட்சியில் அதிக வாய்ப்புகளை வழங்கி அடுத்த தலைமுறைக்கான அரசியல் வாரிசுகளை உருவாக்கத் தலைமை திட்டமிட்டுள்ளது.

மற்றொரு முக்கிய முடிவாக, நிர்வாகச் சீர்திருத்தத்தின் அடிப்படையில் இரண்டு சட்டமன்றத் தொகுதிகளுக்கு ஒரு மாவட்டச் செயலாளர் என்ற புதிய முறை அதிகாரப்பூர்வமாக நடைமுறைக்குக் கொண்டுவரப்பட்டுள்ளது. இதன் மூலம் தற்போதுள்ள திமுக மாவட்டப் பிரிவுகளின் எண்ணிக்கை 110 ஆக உயர்த்தப்படவுள்ளது. மாவட்டங்களின் பரப்பளவைக் குறைப்பதன் மூலம் அடிமட்டத் தொண்டர்கள் மற்றும் பொதுமக்களை நிர்வாகிகள் எளிதில் அணுக முடியும் என்றும், தேர்தல் பணிகளை மிகவும் துல்லியமாகத் திட்டமிட்டுச் செயல்படுத்த இந்த புதிய மாவட்டப் பிரிப்பு முறை பெரிதும் உதவும் என்றும் செயற்குழுவில் ஒருமனதாக முடிவெடுக்கப்பட்டுள்ளது.