“இது என்ன கொடுமை.. இரு குழந்தைகளையும் பறித்த விதியின் கொடூரம்…” மீளாத் துயரத்திலும் பெற்றோர் எடுத்த அந்த ‘தெய்வீக’ முடிவு.. கண்கலங்க வைக்கும் பின்னணி..!!

புனே பிம்ப்ரி அருகே நிகழ்ந்த கொடூரமான சாலை விபத்தில் கௌஷிக் முல்யா மற்றும் ரிஷிதா முல்யாஆகிய உடன்பிறந்த அண்ணன்-தங்கை இருவர் பலியான சோகம் அப்பகுதியில் பெரும் சோகத்தை ஏற்படுத்தியுள்ள நிலையில், அவர்களது குடும்பத்தினர் எடுத்துள்ள துணிச்சலான உறுப்பு மாற்று தான முடிவு அனைவரையும் நெகிழ்ச்சியடையச் செய்துள்ளது. அலண்டியில் உள்ள கல்லூரியில் கணினி பொறியியல் இறுதியாண்டு படித்து வந்த கௌஷிக் மற்றும் 11-ஆம் வகுப்பு படித்து வந்த ரிஷிதா ஆகிய இருவரும் கடந்த ஞாயிற்றுக்கிழமை இரவு கோரவ்டேஸ்வரிலிருந்து பைக்கில் வீடு திரும்பிக் கொண்டிருந்தனர். அப்போது நிக்டி பகுதியில் உள்ள பூனா கேட் ஹோட்டல் அருகே பின்னால் வந்த மற்றொரு பைக் இவர்களது வாகனத்தின் மீது பலமாக மோதியுள்ளது. இந்த விபத்தில் படுகாயமடைந்த இருவரும் இந்திராயணி நகரிலுள்ள தனியார் மருத்துவமனையில் அனுமதிக்கப்பட்ட நிலையில், சிகிச்சை பலனின்றி கௌஷிக் இரவு 10:30 மணியளவில் உயிரிழந்தார். தொடர்ந்து பானேர் பகுதியிலுள்ள தனியார் மருத்துவமனைக்கு மாற்றப்பட்ட தங்கை ரிஷிதாவும் சிகிச்சை பலனின்றி மூளைச்சாவு அடைந்ததாக மருத்துவர்கள் அறிவித்தனர்.

ஒரே நேரத்தில் தங்களது இரு இளம் பிள்ளைகளையும் இழந்து, இந்திராயணி நகர் மினி மார்க்கெட்டில் தையல் தொழிலாளியாகப் பணிபுரியும் தந்தை ரவி முல்யாவின் குடும்பம் அளவிட முடியாத துயரத்தில் மூழ்கியிருந்தது. அத்தகைய மீளாத் துயரத்தின் விளிம்பிலும், தங்களது மகள் ரிஷிதாவின் உடல் உறுப்புகளைத் தானம் செய்ய அந்தக் குடும்பத்தினர் முன்வந்திருப்பது மனிதநேயத்தின் உச்சமாகக் கருதப்படுகிறது. ஒரு தையல் தொழிலாளியின் குடும்பம் தங்களுக்கு நேர்ந்த பேரழிவிலும், மற்றுமொரு உயிரைக் காப்பாற்ற வேண்டும் என்ற நோக்கில் எடுத்த இந்த உன்னதமான முடிவு, உறுப்புத் தானத்தின் முக்கியத்துவத்தை உலகிற்கு உணர்த்தும் மிக உன்னதமான மற்றும் முன்மாதிரியான செயலாகும். தங்களது சொந்தப் பிள்ளைகளை இழந்த போதிலும், தாராள மனதுடன் இந்த இக்கட்டான சூழலில் அவர்கள் எடுத்த இந்தத் துணிச்சலான முடிவைப் பாராட்டி, சமூக வலைத்தளங்களில் பொதுமக்கள் தங்களது நெகிழ்ச்சியான கருத்துகளைப் பகிர்ந்து வருகின்றனர்.