உங்களுக்கு தெரியுமா..? நான் மட்டும் அதிபராக இல்லாவிட்டால் இந்த ரெண்டு நாடும் பூமியிலேயே இருந்திருக்காது… டிரம்ப் போட்ட வெடிகுண்டு..!!

அமெரிக்க அதிபர் டொனால்ட் டிரம்ப், ‘டைம்’ இதழுக்கு அளித்த பிரத்யேகப் பேட்டியில், தான் அமெரிக்காவின் அதிபராக இல்லாதிருந்தால் சவுதி அரேபியா மற்றும் இஸ்ரேல் உள்ளிட்ட நாடுகள் இன்று உலக வரைபடத்திலேயே இருந்திருக்காது என்று அதிரடியான கருத்துக்களைத் தெரிவித்துள்ளார். சவுதி அரேபியாவைத் தான் தான் காப்பாற்றியதாகவும், அந்த நாட்டின் பட்டத்து இளவரசர் முகமது பின் சல்மானுடன் தனக்கு எப்போதுமே மிகச் சிறந்த தனிப்பட்ட உறவு இருந்து வருகிறது என்றும் அவர் குறிப்பிட்டுள்ளார்.

தொடர்ந்து பேசிய டிரம்ப், “நான் சவுதி அரேபியாவிற்காகப் பல முக்கிய விஷயங்களைச் செய்துள்ளேன், அவர்களைப் பாதுகாத்தும் வருகிறேன். நான் மட்டும் அதிபராக இருந்திருக்காவிட்டால் சவுதி அரேபியாவும், இஸ்ரேலும் இன்று இந்த பூமியில் இருந்திருக்க வாய்ப்பில்லை; அவர்கள் உலகப் பரப்பிலிருந்தே முற்றிலும் துடைத்தெறியப்பட்டிருப்பார்கள்” என்று காரசாரமாகக் கூறியுள்ளார். ஏமனில் உள்ள ஹவுதி கிளர்ச்சியாளர்களுக்கு எதிராக அமெரிக்கா நேரடி ராணுவ நடவடிக்கை எடுக்க வேண்டும் என்ற சவுதி இளவரசரின் கோரிக்கையை தான் நிராகரித்த பின்னணியில் இந்த விவாதத்தை அவர் முன்வைத்துள்ளார்.

இதற்கிடையில், செங்கடலின் முக்கிய கப்பல் போக்குவரத்துப் பாதையான பாப் அல்-மண்டாப் ஜலசந்தியைக் கைப்பற்றும் நோக்கில், ஏமனின் ஈரான் ஆதரவு ஹவுதி கிளர்ச்சியாளர்களுக்கு எதிராகச் சவுதி அரேபியா ஒரு புதிய தரைவழித் தாக்குதலைத் திட்டமிட்டு வருவதாகச் செய்திகள் வெளியாகியுள்ளன. இந்தத் தாக்குதல்களுக்கு உளவுத் தகவல்களை வழங்க அமெரிக்கா விருப்பம் தெரிவித்துள்ள போதிலும், அங்கு நேரடியாகத் தனது ராணுவத்தை இறக்கிப் போரில் ஈடுபடாது என்றும் சர்வதேச ஊடகங்கள் தரப்பில் கூறப்படுகிறது.