“அரசு திட்டத்தில் ரூ.2500 வாங்கி தாரேன்..” ஆசை வார்த்தை கூறி பச்சிளம் குழந்தையை கடத்திய பெண்.. மருத்துவமனையில் அரங்கேறிய கொடூரம்.. திடுக்கிடும் பின்னணி..!!

உத்தரப் பிரதேச மாநிலம் நொய்டாவின் இரண்டாம் கட்ட காவல் நிலையப் பகுதியில் உள்ள ஒரு மருத்துவமனையிலிருந்து கடத்தப்பட்ட மூன்று நாள் பச்சிளம் குழந்தையை, காவல்துறையினர் அதிரடி நடவடிக்கை மூலம் எட்டு மணி நேரத்திற்குள் பத்திரமாக மீட்டனர். இந்தக் கடத்தல் சம்பவம் தொடர்பாக 26 வயதான உபாசனா என்ற பெண் கைது செய்யப்பட்டுள்ளார், மேலும் ஒரு சிறுமியும் காவல்துறையின் காவலில் எடுக்கப்பட்டுள்ளார். குற்றம் சாட்டப்பட்ட பெண்ணிடமிருந்து பதிவு எண் இல்லாத ஒரு ஸ்கூட்டரையும் போலீசார் பறிமுதல் செய்துள்ளனர்.

காவல்துறையின் விசாரணையில், இந்தக் குழந்தை அக்டோபர் 6 ஆம் தேதி பங்கெல் என்ற இடத்தில் உள்ள ஒரு மருத்துவமனையில் பிறந்துள்ளது. அக்டோபர் 8 ஆம் தேதி மாலை மருத்துவமனைக்கு வந்த உபாசனா, அரசுத் திட்டத்தின் கீழ் 2,500 ரூபாய் பெற்றுத் தருவதாகக் கூறி குழந்தையின் தாய் மற்றும் பாட்டியுடன் நட்பாகப் பழகியுள்ளார். மறுநாள் காலை மீண்டும் மருத்துவமனைக்கு வந்த அவர், குடும்ப உறுப்பினர்களின் கவனத்தைத் திசைதிருப்பிவிட்டு, பச்சிளம் குழந்தையுடன் தப்பிச் சென்றுள்ளார்.

குழந்தை காணாமல் போனது குறித்த புகாரைத் தொடர்ந்து, போலீசார் சிசிடிவி காட்சிகளை ஆய்வு செய்து தீவிர தேடுதல் வேட்டையில் ஈடுபட்டனர். விரைவாகச் செயல்பட்ட போலீசார், என்.எஸ்.இ.இசட் மெட்ரோ நிலையம் அருகே உபாசனாவைக் கைது செய்து குழந்தையைப் பத்திரமாக மீட்டனர். தனது சகோதரிக்குக் குழந்தைகள் இல்லாததால் குழந்தையைக் கடத்தியதாக உபாசனா கூறியபோதிலும், அவர் ஏதேனும் குழந்தை கடத்தல் கும்பலில் ஈடுபட்டிருக்கலாம் என்ற கோணத்தில் போலீசார் தற்போது தீவிர விசாரணை நடத்தி வருகின்றனர்.