பெரியவர்களுக்கே வராத புத்தி.. நொடிப் பொழுதில் சாதுரியமாகச் செயல்பட்ட சிறுவன்..! இணையத்தைக் கலக்கும் ரியல் ஹீரோ..!!

மழைக்காலத்தில் மலைப்பாதைகளில் பயணம் செய்வது மிகவும் ஆபத்தானது என்பதை உணர்த்தும் வகையில், அண்மையில் சமூக ஊடகங்களில் ஒரு வீடியோ வைரலாகி வருகிறது. மழையினால் சாலை முழுவதும் வழுவழுப்பாக இருந்த ஒரு மலைப்பாதையின் செங்குத்தான ஏற்றத்தில் கார் ஒன்று மேலே ஏற முயன்றது. அப்போது திடீரென கட்டுப்பாட்டை இழந்த அந்த கார், மெதுவாகப் பின்னோக்கி நகரத் தொடங்கியது. அந்தச் சாலையின் பின்னால் மற்ற வாகனங்கள் நின்று கொண்டிருந்ததாலும், போக்குவரத்து இருந்ததாலும் கார் வேகமாகப் பின்னோக்கிச் சென்றிருந்தால் மிகப்பெரிய விபத்து ஏற்பட்டிருக்கும்.

இந்த இக்கட்டான சூழ்நிலையை அங்கே நின்று கொண்டிருந்த பெரியவர்கள் அனைவரும் அதிர்ச்சியுடன் பார்த்துக் கொண்டிருந்தார்களே தவிர, யாருக்கும் உடனடியாக என்ன செய்வதென்று புரியவில்லை. ஆனால், சாலையோரம் நின்று கொண்டிருந்த ஒரு சிறுவன் ஒரு நொடி கூட வீணடிக்காமல் சாதுரியமாகச் செயல்பட்டான். அவன் உடனடியாக ஓடிச் சென்று, அங்கிருந்த ஒரு பெரிய கல்லை எடுத்து, பின்னோக்கி நகர்ந்து கொண்டிருந்த காரின் பின் சக்கரத்திற்கு அடியில் முட்டுக் கொடுத்தான். கல்லை வைத்த அடுத்த கணமே கார் அங்கேயே நின்றது. சிறுவனின் இந்த சமயோசித புத்தியால் ஒரு பெரும் விபத்து தவிர்க்கப்பட்டது.

https://twitter.com/i/status/2072672342233506015

இந்தக் காட்சிகள் அடங்கிய வீடியோ ‘X’ தளத்தில் @Siya_189o என்ற கணக்கில் பகிரப்பட்டு, இதுவரை 41 லட்சத்திற்கும் அதிகமான பார்வையாளர்களைப் பெற்றுள்ளது. இவ்வளவு சிறிய வயதில், எவ்வித பயமும் பதற்றமும் இன்றி மிக விரைவாகச் செயல்பட்ட அந்தச் சிறுவனை நெட்டிசன்கள் பலரும் பாராட்டி வருகின்றனர். “சரியான நேரத்தில் எடுக்கப்பட்ட ஒரு சிறிய முடிவு எவ்வளவு பெரிய விபத்தைத் தடுத்துள்ளது” என்றும், அவன் காரை மட்டும் நிறுத்தவில்லை, பல உயிர்களைக் காப்பாற்றிய நிஜ உலக ஹீரோ என்றும் மக்கள் அவனைப் புகழ்ந்து கமெண்ட் செய்து வருகின்றனர்.