மருமகள் செய்த அலட்சியம்… ஜனனியின் ஆத்திரத்திற்குப் பின் இருக்கும் அதிர்ச்சி உண்மை..! இயக்குநர் மனோஜ்குமார் வெளியிட்ட அதிரடித் தகவல்..!!

தமிழ் சினிமாவின் இமயம் என்று அழைக்கப்படும் இயக்குநர் பாரதிராஜாவின் மறைவுக்குப் பின், அவரது குடும்பத்தில் சொத்துச் சண்டை மற்றும் இறுதிச் சடங்கின் போது ஏற்பட்ட வாக்குவாதங்கள் குறித்து அவரது மைத்துனர் மாலைமலர் இதழுக்கு விரிவான விளக்கம் அளித்துள்ளார். சமூக வலைத்தளங்களில் பரப்பப்படும் ரூ. 1000 கோடி சொத்து என்பது வெறும் வதந்தி என்றும், பிள்ளைகளுக்கு ரூ. 100 கோடி மதிப்பிலான சொத்துகளை அவர் எழுதி வைத்திருந்தாலும், முக்கிய சொத்துகளான நாயுடுகால் கட்டிடம் மற்றும் பிரிக் இன்ஸ்டிடியூட் ஆகியவை கடன் சுமையால் வங்கிகளில் அட்டாச்மென்ட்டில் உள்ளன என்றும் அவர் தெளிவுபடுத்தியுள்ளார். இந்தக் கடன்களை முழுமையாக அடைத்த பிறகே சொத்துகளை முறைப்படி பிரிக்க முடியும் என்பதால் தற்போதைக்கு இதில் சிக்கல் நீடிக்கிறது.

மறைந்த மகன் மனோஜின் குடும்பத்திற்காக சென்னையில் மாதம் 6 லட்சத்திற்கும் மேல் வருமானம் தரக்கூடிய மூன்று முக்கிய சொத்துகளை பாரதிராஜா ஏற்கனவே எழுதி வைத்திருந்தார். இருப்பினும், அவரது மூன்று ஆண்டுகால மருத்துவப் போராட்டத்தின் போது மருமகள் நந்தனா தரப்பிலிருந்து போதிய நிதி உதவியோ கவனிப்போ வழங்கப்படவில்லை என்றும், மகள் ஜனனி தான் தனக்கு கிடைத்த குறைந்த வருமானத்தை வைத்து அவரைப் பராமரித்து வந்தார் என்றும் குற்றச்சாட்டு எழுந்துள்ளது. மேலும், பாரதிராஜாவின் மருத்துவச் செலவுகள் மற்றும் கடன்களை அடைக்க அவசரமாகச் சொத்து ஆவணங்களைக் கேட்டபோது மருமகள் தர மறுத்ததால், தேனியில் உள்ள பூர்வீகச் சீதனச் சொத்தை விற்க வேண்டிய கட்டாயத்திற்கு பாரதிராஜாவின் மனைவி தள்ளப்பட்டுள்ளார்.

தேனியில் நடந்த இறுதிச் சடங்கின் போது மகள் ஜனனி உணர்ச்சிவசப்பட்டு கோபமடைந்ததற்கு சொத்துச் சண்டை காரணமல்ல, மருமகள் மற்றும் பேத்திகளின் காலதாமதமே காரணம் என்று அவர் விளக்கியுள்ளார். தமிழக அரசின் முழு அரசு மரியாதையுடன் இறுதிச் சடங்குகளை மாலை 4:30 மணிக்குள் முடிக்க வேண்டும் என அதிகாரிகள் காலக்கெடு விதித்திருந்த சூழலில், முக்கிய சடங்கான நீர்மாலை எடுக்க வேண்டிய பேத்திகளை மருமகள் நந்தனா மதியம் 2:45 மணிக்கு மிகத் தாமதமாகவே அழைத்து வந்துள்ளார். பாரதிராஜா மருத்துவமனையில் இருந்தபோது பார்க்க வராதது, முதலமைச்சர் அஞ்சலி செலுத்த வந்தபோது வீட்டில் இல்லாதது, மற்றும் இறுதிச் சடங்கிலும் தாமதம் செய்து அரசு மரியாதைக்குச் சிக்கல் ஏற்படுத்தியது போன்ற காரணங்களால் எல்லையற்ற துக்கத்திலிருந்த ஜனனி அங்கு உணர்ச்சிவசப்பட்டுப் பேசியதாக அவரது மைத்துனர் வதந்திகளுக்கு முற்றுப்புள்ளி வைத்துள்ளார்.