“ரகசியமாகக் கையெழுத்து வேட்டை” எடப்பாடிக்கு தெரியாமல் சி.வி.சண்முகம், வேலுமணி செய்யும் வேலை… லீக்கான மெசேஜால் அதிரடி திருப்பம்..!!

2026 சட்டமன்றத் தேர்தல் தோல்விக்குப் பிறகு அதிமுகவை மீண்டும் வலுப்படுத்தும் பணிகளில் எடப்பாடி பழனிசாமி தீவிரமாக இறங்கியுள்ள நிலையில், அவருக்கு எதிராகக் கட்சிக்குள் ரகசியமாகக் கையெழுத்து வேட்டை நடைபெற்று வருவது பெரும் பரபரப்பை ஏற்படுத்தியுள்ளது. முன்னாள் அமைச்சர்கள் சி.வி.சண்முகம் மற்றும் எஸ்.பி.வேலுமணி ஆகிய இருவரும் எடப்பாடி பழனிசாமி மீது கடுமையான அதிருப்தியில் இருந்து வருகின்றனர். தற்போது இவர்கள் இருவரும் எடப்பாடி பழனிசாமிக்குத் தெரியாமல், கட்சியின் பொதுக்குழு மற்றும் செயற்குழு உறுப்பினர்களை நேரடியாகத் தொடர்புகொண்டு இந்த ரகசியப் பணிகளைச் சத்தமில்லாமல் மேற்கொண்டு வருகின்றனர்.

ஏற்கனவே அதிமுகவில் உள்ள 40 சதவீதத்திற்கும் அதிகமான மாவட்டச் செயலாளர்களிடம் சி.வி.சண்முகம் தரப்பு ரகசியமாகக் கையெழுத்து வாங்கியதாகக் கூறப்படுகிறது. அதனைத் தொடர்ந்து, தற்போது பொதுக்குழுவைக் கூட்டி, கட்சியை விட்டுப் பிரிந்து சென்ற சசிகலா, ஓ.பன்னீர்செல்வம், டிடிவி தினகரன் உள்ளிட்ட அனைவரையும் மீண்டும் ஒன்றிணைக்கத் தீர்மானம் கொண்டு வரத் திட்டமிட்டுள்ளனர். இதற்கு ஒருவேளை எடப்பாடி பழனிசாமி சம்மதிக்க மறுத்தால், அவரைப் பொதுச்செயலாளர் பதவியில் இருந்தே விலகக் கோரி அழுத்தம் கொடுக்கவும் இந்த ரகசியக் கையெழுத்துகள் பயன்படுத்தப்பட உள்ளதாகத் தெரிகிறது.

மிகுந்த ரகசியமாக வைக்கப்பட்டிருந்த இந்த விவகாரம் தொடர்பான முக்கிய மெசேஜ் ஒன்று எதிர்பாராத விதமாக லீக் ஆனதால், ஒட்டுமொத்தத் திட்டமும் எடப்பாடி பழனிசாமி தரப்பிற்குத் தெரியவந்துள்ளது. இதனால் அதிர்ச்சியடைந்துள்ள எடப்பாடி பழனிசாமி தரப்பு, தற்போது யார் யார் தங்களுக்கு விசுவாசமாக இருக்கிறார்கள் என்று ரகசியமாகக் கணக்கெடுக்கும் பணியில் இறங்கியுள்ளது. ஒருபுறம் உள்ளாட்சித் தேர்தலுக்காக எடப்பாடி பழனிசாமி நிர்வாகிகளைச் சந்தித்து வரும் வேளையில், கட்சிக்குள் அவருக்கு எதிராக நடக்கும் இந்த அதிரடி நகர்வுகள் அதிமுகவில் ஒரு புதிய அரசியல் புயலைக் கிளப்பியுள்ளன.