“உலக வரைபடத்திலிருந்தே ஈரான் முற்றிலும் துடைத்தெறியப்படும்” அமெரிக்க அதிபர் டொனால்ட் டிரம்ப் விடுத்த அதிரடி இறுதி எச்சரிக்கை…!!

அமெரிக்கா மற்றும் ஈரான் இடையிலான போர் நிறுத்த ஒப்பந்தம் மீறப்பட்டுள்ளதாகக் கூறி, அமெரிக்க அதிபர் டொனால்ட் டிரம்ப் ஈரானுக்குக் கடுமையான இறுதி எச்சரிக்கையை விடுத்துள்ளார். அண்மையில் ஹார்முஸ் ஜலசந்தி பகுதியில் பனாமா நாட்டின் எண்ணெய் கப்பல் மீது ஈரான் ட்ரோன் தாக்குதல் நடத்தியதைத் தொடர்ந்து, அமெரிக்கா அங்குள்ள ஈரானின் ஏவுகணை மற்றும் ட்ரோன் சேமிப்புக் கிடங்குகள் மீது அடுத்தடுத்து வான்வழித் தாக்குதல்களை நடத்தியது. இந்த மோதலைத் தொடர்ந்து, ட்ரூத் சோஷியல்  சமூக ஊடகத்தில் பதிவிட்ட டிரம்ப், ஈரான் மீண்டும் போர் நிறுத்த ஒப்பந்தத்தை மீறியுள்ளதாகக் கடுமையாகக் குற்றம் சாட்டினார்.

அமெரிக்கா மற்றும் இஸ்ரேல் நாடுகள் இணைந்து ஈரானுக்கு எதிராகத் தொடங்கிய ராணுவ நடவடிக்கை ஒரு தற்காலிக போர் நிறுத்தத்தில் இருந்த நிலையில், தற்போதைய பதற்றம் அதனை மீண்டும் சீர்குலைத்துள்ளது. “நாங்கள் தொடர்ந்து பொறுமையாக இருக்க முடியாத ஒரு கட்டம் வரலாம்; நாங்கள் மிக வெற்றிகரமாகத் தொடங்கிய ராணுவப் பணியை முழுமையாக முடிக்க வேண்டிய கட்டாயத்திற்குத் தள்ளப்படலாம்,” என்று டிரம்ப் குறிப்பிட்டுள்ளார். அவ்வாறு மீண்டும் ஒரு முழு அளவிலான போர் வெடித்தால், “ஈரான் என்ற இஸ்லாமியக் குடியரசு நாடே பூமியில் இல்லாமல் அழிந்துவிடும்” என்று அவர் மிகக் கடுமையான வார்த்தைகளில் எச்சரித்துள்ளார்.

டிரம்பின் இந்த மிரட்டலுக்குப் பதிலடி கொடுத்துள்ள ஈரான், வளைகுடா பகுதியில் உள்ள அமெரிக்க ராணுவத் தளங்கள் அனைத்தும் “நரகத்தை அனுபவிக்கும்” என்று எச்சரித்துள்ளது. அமெரிக்க நாடாளுமன்றத்தின் செனட் சபை, அதிபர் டிரம்ப் தன்னிச்சையாகப் போரைத் தொடங்குவதைக் கட்டுப்படுத்தும் தீர்மானத்தை நிறைவேற்றிய போதிலும், டிரம்ப் நிர்வாகம் அதனைப் பொருட்படுத்தாமல் ஈரானின் அணுஆயுதப் பெருக்கத்தைத் தடுப்பதே தங்களின் முதல் இலக்கு எனத் தெளிவுபடுத்தியுள்ளது. உலகின் மிக முக்கியமான எண்ணெய் போக்குவரத்துப் பாதையான ஹார்முஸ் ஜலசந்தியில் ஏற்பட்டுள்ள இந்த மோதல் போக்கு, உலக அளவில் பெரும் பதற்றத்தையும் பொருளாதார ரீதியான கவலைகளையும் ஏற்படுத்தியுள்ளது.