“உள்ளே வந்தா அவமானப்படுத்திருவாங்க” ஸ்டாலினுக்கு உதயநிதி போட்ட முட்டுக்கட்டை.. லண்டன் பயணத்திற்கு முன் பரபரப்பு ஆலோசனை..!!

நடைபெறவுள்ள இடைத்தேர்தலில் மு.க.ஸ்டாலின் போட்டியிட வேண்டாம் என்று அவரது மகன் உதயநிதி ஸ்டாலின் அறிவுறுத்தியுள்ளதாகத் தகவல்கள் வெளியாகியுள்ளன. ஸ்டாலின் லண்டன் செல்வதற்கு முன்பாக, தற்போதைய அரசியல் சூழல் குறித்து இருவரும் தீவிர ஆலோசனையில் ஈடுபட்டுள்ளனர். அப்போது, தற்போதைய சட்டப்பேரவையின் சூழல் ஆரோக்கியமானதாக இல்லை என்றும், மீண்டும் அவர் உள்ளே வந்தால் அவரை அவமானப்படுத்தும் விதத்திலான நிகழ்வுகள் அரங்கேறக்கூடும் என்றும் உதயநிதி சுட்டிக்காட்டியுள்ளார். இதன் காரணமாகவே, தேவையற்ற அரசியல் சங்கடங்களைத் தவிர்க்க இடைத்தேர்தலில் போட்டியிடுவதை மு.க.ஸ்டாலின் தவிர்க்க வேண்டும் என உதயநிதி அறிவுறுத்தியதாகக் கூறப்படுகிறது.

இந்த ஆலோசனையின் போது, தற்போதைய அரசியல் களம் மற்றும் கட்சியின் எதிர்கால நகர்வுகள் குறித்தும் விரிவாக விவாதிக்கப்பட்டுள்ளது. இடைத்தேர்தலில் நேரடியாகப் போட்டியிடுவதை விட, கட்சியின் பிற முக்கிய நிர்வாகிகளுக்கு வாய்ப்பளித்து, வெளியில் இருந்து தேர்தல் பணிகளை ஒருங்கிணைப்பதே தற்போதைய சூழலுக்குச் சரியாக இருக்கும் என உதயநிதி தரப்பில் வலியுறுத்தப்பட்டுள்ளது. மு.க.ஸ்டாலினின் லண்டன் பயணத்தைத் தொடர்ந்து இந்த அரசியல் வியூகம் குறித்த இறுதி முடிவு அதிகாரப்பூர்வமாக அறிவிக்கப்படலாம் என அரசியல் வட்டாரங்கள் தெரிவிக்கின்றன.