உஷார் மக்களே! 24 மணிநேரமும் கண்காணிப்பு… பெண்ணிடம் 9 லட்சத்தை சுருட்டியவனை அதிரடியாக தூக்கிய தமிழக போலீஸ்! பொதுமக்களுக்கு எச்சரிக்கை கொடுத்த எஸ்பி..!!

திண்டுக்கல் மாவட்டத்தைச் சேர்ந்த பெண் ஒருவரை தொலைபேசியில் தொடர்பு கொண்ட மர்ம நபர், தன்னை உயர் காவல்துறை அதிகாரி எனக்கூறி அதிநவீன ‘டிஜிட்டல் அரஸ்ட்’ மோசடியில் ஈடுபட்டுள்ளார். அந்தப் பெண்ணின் சிம்கார்டு தீவிரவாதிகளால் பயன்படுத்தப்படுவதாகவும், அவர் மீது தேசத்துரோக வழக்கு பதியப்பட்டுள்ளதாகவும் கூறி அந்த நபர் மிரட்டியுள்ளார். மேலும், 24 மணி நேரமும் ரகசிய கண்காணிப்பில் இருப்பதாகவும், தன்னை நிரபராதி என நிரூபிக்க ரிசர்வ் வங்கியின் கணக்கிற்கு தனது முழுப் பணத்தையும் மாற்ற வேண்டும் என்றும் பயமுறுத்தியுள்ளார். இதனால் கடும் பதற்றமடைந்த அந்தப் பெண்மணி, மர்ம நபர் கொடுத்த போலியான வங்கி கணக்கிற்கு 9 லட்சம் ரூபாயை ஆன்லைன் மூலம் அனுப்பி ஏமாந்துள்ளார். பணம் சென்றடைந்தவுடன் அந்த நபர் இணைப்பைத் துண்டித்து தலைமறைவாகியுள்ளார்.

தான் ஏமாற்றப்பட்டதை உணர்ந்த அப்பெண், உடனடியாக தேசிய சைபர் கிரைம் பிரிவில் புகார் அளித்தார். திண்டுக்கல் மாவட்ட காவல் கண்காணிப்பாளர் ஜெயக்குமார் அவர்களின் உத்தரவின் பேரில் அமைக்கப்பட்ட தனிப்படை போலீசார், தொலைபேசி மற்றும் வங்கி பரிவர்த்தனை விவரங்களை தீவிரமாக ஆராய்ந்தனர். இந்த விசாரணையில், மோசடியில் ஈடுபட்டது பெங்களூருவைச் சேர்ந்த 20 வயது கல்லூரி மாணவனான பர்தீன் அப்பாஸ் என்பது கண்டுபிடிக்கப்பட்டு, அவர் உடனடியாக கைது செய்யப்பட்டார். அவரிடமிருந்து 7 லட்சம் ரூபாய் வெற்றிகரமாக மீட்கப்பட்டு அவர் சிறையிலடைக்கப்பட்டார். பொதுமக்கள் இதுபோன்ற போலியான ‘டிஜிட்டல் அரஸ்ட்’ மிரட்டல் அழைப்புகளைக் கண்டு அச்சப்பட வேண்டாம் எனவும், எந்தவொரு சந்தேகம் ஏற்பட்டாலும் உடனடியாக 1930 என்ற அவசர எண்ணிற்கோ அல்லது சைபர் கிரைம் இணையதளத்திலோ புகார் அளிக்குமாறும் காவல்துறை தரப்பில் அறிவுறுத்தப்பட்டுள்ளது.