3 ஆண்டுகளில் கவிழ்கிறது விஜய் ஆட்சி..? ஒரே நாடு ஒரே தேர்தலால் வரப்போகும் ஆபத்து.. தமிழக அரசியலை அதிர வைக்கும் ஆர்.பி. உதயகுமார்..!!

மத்திய அரசு கொண்டு வர முயற்சிக்கும் “ஒரே நாடு, ஒரே தேர்தல்” மசோதா அமலுக்கு வந்தால் தமிழக அரசியல் சூழல் முற்றிலுமாக மாறும் என்றும், அதன் காரணமாகத் தற்போதைய முதலமைச்சர் விஜய் தலைமையிலான தவெக அரசு 3 ஆண்டுகளுக்குள் கவிழும் அல்லது மாற்றத்தைச் சந்திக்கும் என்றும் அதிமுக முன்னாள் அமைச்சர் ஆர்.பி. உதயகுமார் தெரிவித்துள்ளார். மதுரையில் நடைபெற்ற அதிமுக நிர்வாகிகள் ஆலோசனைக் கூட்டத்தில் பேசிய அவர், காங்கிரஸ் போன்ற கட்சிகள் இந்தத் திட்டத்திற்கு எதிர்ப்புத் தெரிவித்தாலும், நாடாளுமன்ற நடைமுறைகளின்படி எதிர்காலத்தில் இது சட்டமாக மாற அதிக வாய்ப்புகள் உள்ளதாகக் குறிப்பிட்டுள்ளார்.

அதிமுக மற்றும் திமுக ஆகிய பாரம்பரியக் கட்சிகள் பல தசாப்தங்களாக உருவாக்கியுள்ள பலமான அடிமட்டக் கட்டமைப்பை, குறுகிய காலத்தில் தவெக போன்ற புதிய கட்சியால் உருவாக்க முடியாது என்று ஆர்.பி. உதயகுமார் விமர்சித்துள்ளார். இதன் காரணமாகவே பிற கட்சிகளின் முக்கிய நிர்வாகிகளையும், அவர்களின் அரசியல் பலத்தையும் தங்கள் பக்கம் ஈர்க்க தவெக தீவிரமாக முயன்று வருகிறது. அதிமுகவில் இருந்து சில மாஜிக்கள் தவெகவில் இணைந்திருந்தாலும், கட்சியின் உண்மையான விசுவாசமுள்ள அடிமட்டத் தொண்டர்களை எந்த சக்தியாலும் அசைக்கவோ, பிரிக்கவோ முடியாது என்றும் அவர் திட்டவட்டமாகப் பேசியுள்ளார்.

மக்களால் தேர்ந்தெடுக்கப்பட்ட சட்டப்பேரவை உறுப்பினர்கள் சுயநலத்திற்காகக் கட்சி மாறுவது ஜனநாயகத்திற்கு உகந்த நல்ல முன்னுதாரணம் அல்ல என்றும் ஆர்.பி. உதயகுமார் சுட்டிக்காட்டியுள்ளார். மேலும், அதிமுகவில் வளர்ந்துவிட்டுப் பின்னர் அதே தாய்க் கழகத்தை விமர்சிப்பவர்களின் போக்கு ஏற்றுக் கொள்ளத்தக்கது அல்ல என மதுரை அமைச்சரை அவர் மறைமுகமாகத் தாக்கியுள்ளார். எந்தவொரு ஆளுங்கட்சியின் அதிகாரமும் இங்கு நிரந்தரமானது அல்ல என்ற யதார்த்தத்தை முன்வைத்துள்ள அவர், “ஒரே நாடு, ஒரே தேர்தல்” மூலம் 3 வருடங்களுக்குள் தவெக அரசின் நிலை நிச்சயம் மாறும் எனத் தனது அரசியல் கணிப்பை அழுத்தமாகப் பதிவு செய்துள்ளார்.