“திமுக எம்பிக்கள் ராஜினாமா பண்ணட்டும், நானும் பண்றேன்!”.. அதிரடி சவால் விட்ட துரை வைகோ.. கூட்டணியில் வெடித்த மோதல்..!!

திருச்சியில் பேட்டியளித்த நாடாளுமன்ற உறுப்பினர் துரை வைகோ, தான் திருச்சி லோக்சபா தொகுதியில் எம்பியாக வெற்றி பெற்றதற்கு திமுகவின் பங்கு நிச்சயமாக உள்ளது என்பதை ஒப்புக்கொண்டார். அதே வேளையில், அவர்கள் மட்டுமின்றி கூட்டணியில் இருந்த மற்ற அனைத்துக் கட்சிகளின் பங்களிப்பும் தனது வெற்றிக்குக் காரணமாக அமைந்தது என்று அவர் குறிப்பிட்டுள்ளார். தன்னை மட்டும் எம்பி பதவியை ராஜினாமா செய்யச் சொல்லி வற்புறுத்தும் திமுக, முதலில் தங்களது கட்சி எம்பிக்களையும் ராஜினாமா செய்யச் சொல்ல வேண்டும் என்று சவால் விடுத்துள்ள அவர், அப்படி அவர்கள் செய்தால் தானும் தனது பதவியை உடனடியாக ராஜினாமா செய்யத் தயாராக இருப்பதாகத் தெரிவித்துள்ளார். தொடர்ந்து திமுகவின் தற்போதைய அரசியல் நிலைப்பாட்டை விமர்சித்த துரை வைகோ, திமுக தற்போதைய சூழலில் மீண்டும் ஒரு தேர்தலைச் சந்திக்குமேயானால், அக்கட்சிக்கு ஒரு எம்பி சீட் கூடக் கிடைக்காது என்று மிகக் காரசாரமாகக் கணித்துக் கூறியுள்ளார்.

இதன் மூலம் திமுக மீதான தனது அரசியல் எதிர்ப்பையும், கூட்டணியில் நிலவும் தற்போதைய விரிசலையும் அவர் வெளிப்படுத்தியுள்ளார். கடந்த சட்டமன்றத் தேர்தலில் திமுக கூட்டணியில் நடைபெற்ற பண விநியோகம் குறித்தும் அவர் கடுமையான குற்றச்சாட்டுகளை முன்வைத்துள்ளார். ஒரு தொகுதிக்குக் குறைந்தது 20 கோடி ரூபாயும், சில முன்னாள் அமைச்சர்களின் தொகுதிகளில் 100 கோடி ரூபாய் வரையிலும் பெருமளவில் பணம் செலவிடப்பட்டதாக அவர் பகிரங்கமாகத் தெரிவித்துள்ளார். மதிமுக உள்ளிட்ட கூட்டணிக் கட்சிகள் போட்டியிட்ட அனைத்து 234 தொகுதிகளிலும் எவ்வளவு செலவிடப்பட்டுள்ளது என்பதை நீங்களே கணக்கிட்டுக் கொள்ளுங்கள் என்றும், இவ்வளவு கோடிகளை வாரி இறைத்தும் அவர்களால் தேர்தலில் வெற்றி பெற முடியவில்லை என்றும் அவர் சாடியுள்ளார்.