“அரிசி வாங்கலாம்… மீதியை நீயே வச்சுக்கோ..! 600 ரூபாய் சம்பாதிச்ச மனைவி… துள்ளி குதிச்ச கணவன்…!” சோஷியல் மீடியாவில் ட்ரெண்டாகும் திரிபுரா தம்பதியின் நெகிழ்ச்சி வீடியோ..!!

குடும்பத்தைக் காப்பாற்றுவதற்காகப் பணம் சம்பாதிப்பது என்பது எளிதான காரியம் அல்ல. அன்றாடத் தேவைகளைப் பூர்த்தி செய்ய கணவனும் மனைவியும் தங்களால் இயன்ற கடின உழைப்பை அளிக்கின்றனர். அப்படி உழைத்துச் சம்பாதித்த பணம் கையில் கிடைக்கும்போது, அந்தத் தொகை சிறியதாக இருந்தாலும் அதிலிருந்து கிடைக்கும் மகிழ்ச்சி மிகவும் பெரியதாகும். அந்த வகையில், திரிபுராவைச் சேர்ந்த ரோபி பில் என்பவர் தன் மனைவியுடன் சேர்ந்து இன்ஸ்டாகிராமில் பகிர்ந்த வீடியோ ஒன்று இணையத்தில் வைரலாகி, மக்களின் இதயங்களை வென்று வருகிறது.

அந்த வீடியோவில், ரோபி தன் மனைவியின் உழைப்பில் கிடைத்த பணத்தைப் பெற்றுக்கொண்டு மிகுந்த மகிழ்ச்சியுடன் காணப்படுகிறார். தங்களுக்குப் பணம் கிடைத்திருப்பதாகவும், அதுவும் குறிப்பாகத் தன் மனைவி வேலை செய்து உழைத்துச் சம்பாதித்த பணம் என்பதால் அது மிகவும் சிறப்பு வாய்ந்தது என்றும் கேமராவைப் பார்த்து அவர் கூறுகிறார். மனைவி சம்பாதித்த 600 ரூபாயைக் கையில் வைத்துக்கொண்டு இருவரும் வீட்டின் தேவைகளை நிறைவேற்றப் புறப்படுகிறார்கள். அந்தப் பணத்தில் முதலில் அரிசி வாங்க வேண்டும் என்று கூறும் கணவன், மீதமுள்ள தொகையில் மனைவிக்கு விருப்பமானதை வாங்குமாறு அன்புடன் கூறுகிறார்.

https://www.instagram.com/reel/Db8WXM4TuA_/?utm_source=ig_web_button_share_sheet

தற்போது மழைக்காலம் என்பதால் தனக்குச் சரியாக வேலை கிடைக்கவில்லை என்றும், அதனால் தம்மால் அதிகமாகச் சம்பாதிக்க முடியவில்லையென்றும் ரோபி குறிப்பிடுகிறார். இந்தச் சூழலில் மனைவியின் உழைப்பு வீட்டிற்குப் பெரும் உதவியாக இருப்பதை எண்ணி மகிழும் அவர், சிரித்த முகத்துடன் “கவலைப்படாதே, அப்புறமாக உனக்குத் தந்துவிடுகிறேன்” என்று மனைவியிடம் கூறுகிறார். உழைப்பின் மதிப்பையும், சிறிய தொகையிலும் நிறைந்திருக்கும் அன்பையும் வெளிப்படுத்தும் இந்த எளிய தம்பதியின் நெகிழ்ச்சியான வீடியோவை இணையவாசிகள் பலரும் பாராட்டி பகிர்ந்து வருகின்றனர்.