“இப்படி போனா உயிர் என்னாகுறது..?”… ஓடும் ரயிலில் தொங்கியபடி பெண்கள் செய்த ஆபத்தான பயணம்… நெஞ்சை பதறவைக்கும் காணொளி..!!

மும்பை ரயிலின் வெளிப்புறத்தில் இரண்டு பெண்கள் ஆபத்தான முறையில் தொங்கிக்கொண்டு பயணம் செய்யும் அதிர்ச்சியூட்டும் காணொளி சமூக வலைதளங்களில் வெளியாகி பெரும் விவாதத்தை ஏற்படுத்தியுள்ளது. இணையதளத்தில் பகிரப்பட்ட இந்தக் காட்சியில், வேகமாக ஓடிக்கொண்டிருக்கும் ரயிலின் உள்பகுதியில் இடம் இல்லாததால், இரு பெண்கள் ரயிலின் கதவுப் பகுதியை கெட்டியாகப் பிடித்துக்கொண்டு, உடலின் பெரும்பகுதி வெளியே நீட்டியபடி பயணிப்பது பதிவாகியுள்ளது.

இந்தக் காணொளியில் உள்ள ஒரு பெண் மலர் அச்சிடப்பட்ட வெள்ளை நிற மேல்சட்டையும், நீலப்பச்சை நிற கால்சட்டையும் அணிந்து கொண்டு, முதுகில் பையுடன் ரயிலின் பக்கவாட்டைப் பிடித்தபடி தொங்குகிறார். அவருக்கு சற்று மேலாக மற்றொரு பெண்ணும் அதேபோல் ரயிலைப் பிடித்தபடி ஆபத்தான நிலையில் நிற்கிறார். ரயில்கள் அடுத்தடுத்து கடந்து செல்லும் இந்தத் தண்டவாளப் பகுதியில், சிறு பிடி நழுவினாலும் உயிர்ச்சேதம் ஏற்படும் என்ற பயமின்றி அவர்கள் பயணிப்பது பார்ப்போரை உரைய வைத்துள்ளது.

இந்தக் காட்சி இணையத்தில் பரவியதைத் தொடர்ந்து, மும்பையின் கூட்ட நெரிசல் மற்றும் பயணிகளின் பாதுகாப்பு குறித்துப் பொதுமக்கள் கடுமையான கேள்விகளை எழுப்பி வருகின்றனர். இதுபோன்ற உயிருக்கு ஆபத்தான பயணங்களைப் பெருமையாகப் பேசுவதை நிறுத்த வேண்டும் என்றும், இது வீரம் அல்ல, மாறாகப் போதிய ரயில் கட்டமைப்பு இல்லாததால் ஏற்படும் நடுத்தர மக்களின் கையறு நிலை என்றும் சமூக வலைதளப் பயனர்கள் தங்கள் குமுறல்களை வெளிப்படுத்தி வருகின்றனர்.