“வர்ற வருமானத்த சமமா பிரிச்சுப்போம்..” ஊழல் செய்ய கூட்டு சத்தியப்பிரமாணம் எடுத்த பாஜக கவுன்சிலர்கள்… கையில் தண்ணீரை வைத்து விசித்திர சத்தியம்.. அம்பலப்படுத்திய காங்கிரஸ்..!!

உத்தரபிரதேச மாநிலம் ஷாஜஹான்பூர் மாநகராட்சி கவுன்சிலர்கள் சிலர், தங்களுக்குள் வருமானத்தைச் சமமாகப் பிரித்துக் கொள்வதாக விசித்திரமான முறையில் சத்தியப்பிரமாணம் எடுத்துக்கொண்ட வீடியோ சமூக வலைதளங்களில் வெளியாகி பெரும் அதிர்வலைகளை ஏற்படுத்தியுள்ளது. இந்த வீடியோ வெளியானது முதலே ஊழல் குற்றச்சாட்டுகள் எழுந்துள்ளதோடு, இது குறித்து முறையான விசாரணை நடத்த வேண்டும் என்ற கோரிக்கைகளும் வலுத்து வருகின்றன.

இந்த வீடியோவில் இருக்கும் பெரும்பாலான கவுன்சிலர்கள் பாஜகவைச் சேர்ந்தவர்கள் என்று கூறப்படுகிறது.வைரலாகும் அந்த வீடியோவில், ஒரு கவுன்சிலர் தனது கையில் தண்ணீரை வைத்துக் கொண்டு மற்ற கவுன்சிலர்களுக்குச் சத்தியப்பிரமாணம் செய்து வைக்கிறார். மாநகராட்சியின் மூலம் கிடைக்கும் வருமானத்தை அனைவரும் சமமாகப் பகிர்ந்து கொள்வோம் என்றும், தங்களில் யாராவது ஒருவர் சட்ட ரீதியான சிக்கலில் மாட்டிக் கொண்டால் அனைவரும் ஒன்றாக இணைந்து அவருக்குத் துணையாக நிற்போம் என்றும் அவர்கள் உறுதியளிக்கின்றனர்.

மேலும், இந்த குழுவிற்குத் துரோகம் இழைப்பவர்களின் தாயாரைக் குறிப்பிட்டு மிகவும் ஆபாசமான மற்றும் அநாகரிகமான வார்த்தைகளைப் பயன்படுத்தி அவர்கள் சத்தியம் செய்வதும் அந்த வீடியோவில் பதிவாகியுள்ளது.இந்த வீடியோ சுமார் ஆறு மாதங்களுக்கு முன்பு எடுக்கப்பட்டதாகக் கூறப்பட்டாலும், அதன் உண்மைத்தன்மையை இன்னும் சுயாதீனமாக உறுதிப்படுத்த முடியவில்லை. இது குறித்து ஷாஜஹான்பூர் மேயர் அர்ச்சனா வர்மாவிடம் கேட்டபோது தமக்கு எதுவும் தெரியாது என்று கூறியுள்ளார். இந்தச் சம்பவத்திற்கு அரசியல் ரீதியாகக் கடுமையான எதிர்ப்புகள் கிளம்பியுள்ளன; மாநகராட்சியில் ஊழல் உச்சக்கட்டத்தை எட்டிவிட்டதாகக் காங்கிரஸ் கட்சி குற்றம் சாட்டியுள்ளதுடன், இது பொதுமக்களுக்கு மிகத் தவறான செய்தியைக் கொண்டு சேர்க்கும் எனச் சமாஜ்வாதி கட்சியும் வேதனை தெரிவித்துள்ளது.