என்னப்பா சொல்றீங்க… இனிமே வீடு கட்ட செங்கல், சிமெண்ட் எதுவுமே வேணாம..? வெறும் 7 நாளில் பிளாஸ்டிக் குப்பையை உருக்கி… 100 வருஷம் தாங்கும் வீட்டை கட்டி அசத்திய நபர்…! மெக்சிகோகாரரின் மிரள வைக்கும் சாதனை..!!

மெக்சிகோவைச் சேர்ந்த தொழிலதிபர் கார்லோஸ் டேனியல் கொன்சாலஸ் என்பவர், தூக்கி எறியப்படும் பிளாஸ்டிக் கழிவுகளை உருக்கி ஏழை மக்களுக்கு வீடுகளைக் கட்டிக் கொடுக்கும் ஒரு சூழல் நட்புத் திட்டத்தைச் செயல்படுத்தி வருகிறார். மத்திய மெக்சிகோவில் உள்ள அவரது ‘ஈகோடோம்’ என்ற சமூக நிறுவனம், பழைய பொம்மைகள் மற்றும் வீணான பிளாஸ்டிக் கழிவுகளைச் சேகரித்து தொழிற்சாலையில் உருக்கி, உறுதியான சுவர்கள் மற்றும் கூரை பேனல்களைத் தயாரிக்கிறது. பியூப்லா மாநிலத்தில் 64% மக்கள் வறுமையில் வாடும் சூழலிலும், மெக்சிகோ ஆண்டிற்கு 5 மில்லியன் டன் பிளாஸ்டிக் கழிவுகளை உருவாக்கும் நிலையிலும், பிளாஸ்டிக் மாசுபாடு மற்றும் மலிவு விலை வீடில்லாமை ஆகிய இரு பெரும் பிரச்சினைகளுக்கும் இத்திட்டம் ஒரே தீர்வாக அமைந்துள்ளது.

இந்த பேனல்கள் தயாரிப்பில் நச்சுப் பிளாஸ்டிக்குகள் அகற்றப்பட்டு, மீதமுள்ளவை சிறு துண்டுகளாக வெட்டப்பட்டு, 30 நிமிடங்கள் சூடான ஓவனில் வைக்கப்பட்டு ஹைட்ராலிக் அழுத்த இயந்திரம் மூலம் சுருக்கப்பட்டுத் திடமான பேனல்களாக உருவாக்கப்படுகின்றன. பியூப்லா தொழிற்சாலையில் நாளொன்றுக்கு 120 பேனல்கள் தயாரிக்கப்படுகின்றன. இரண்டு படுக்கையறைகள், ஒரு குளியலறை, வரவேற்பறை மற்றும் சமையலறை கொண்ட 40 சதுர மீட்டர் பரப்பளவுள்ள ஒரு வீட்டைக் கட்ட சுமார் 80 பேனல்கள் (2 டன் பிளாஸ்டிக்) தேவைப்படுகின்றன. இத்தகைய வீட்டை வெறும் 7 நாட்களில் கட்டி முடிக்க முடிவதுடன், அரசின் வீட்டு வசதித் திட்டத்தின் மூலம் இந்த வீடுகள் வெறும் $280 குறைந்த விலையில் ஏழை மக்களுக்குக் கிடைக்கின்றன.

இந்த பிளாஸ்டிக் வீடுகள் குறைந்த செலவில் கிடைப்பது மட்டுமன்றி, உட்புறத்தைச் கதகதப்பாக வைத்திருக்க உதவும் என்றும், அடுத்த 100 ஆண்டுகளுக்கு எந்தப் பாதிப்பும் இன்றி உறுதியாக இருக்கும் என்றும் இதன் நிறுவனர் தெரிவிக்கிறார். மேலும், பிளாஸ்டிக் கழிவுகளைச் சேகரிப்பவர்களுக்கு அதிக வருமானம் கிடைக்கும் வகையில் ஒப்பந்தம் செய்து நாளொன்றுக்கு 5.5 டன் பிளாஸ்டிக்கைப் பயன்படுத்தி உள்ளூர் பொருளாதாரத்தையும் இவர்கள் உயர்த்துகின்றனர். இதுவரை 500-க்கும் மேற்பட்ட அறைகளையும் நூற்றுக்கணக்கான வீடுகளையும் கட்டியுள்ள இந்நிறுவனம், தற்போது அரசு மற்றும் தனியார் அமைப்புகளுக்கும் இந்த பேனல்களை வழங்கி வருவதுடன், பிற நாடுகளுக்கும் தனது சேவையை விரிவுபடுத்த ஆயத்தமாகி வருகிறது.