“பணத்துக்காக உயிரைக் கொடுக்காதீங்க…” 24 வயதில் பானை உடைக்கச் சென்று உடைந்த எலும்புகள்… 18 ஆண்டுகளாக படுக்கையிலேயே கழியும் வாழ்க்கை… கண்ணீருடன் கதறும் பிவண்டி இளைஞர்..!!!

மகாராஷ்டிராவின் தானே மாவட்டம், பிவண்டியைச் சேர்ந்த நாகேஷ் போய்ர் என்பவருக்கு 2009-ஆம் ஆண்டு தனது 24-வது வயதில் தயிர் ஹண்டி விழாவில் பங்கேற்றபோது ஒரு கொடூரமான விபத்து ஏற்பட்டது. மனித பிரமிட்டின் உயரத்தில் ஏறி தயிர் பானையை உடைக்க முயன்றபோது, பிரமிட்டின் சமநிலை குலைந்து அவர் மிக உயரத்திலிருந்து கீழே விழுந்தார். இந்த விபத்தில் அவரது தலை, கால்கள், இடுப்பு மற்றும் கைகளில் பல இடங்களில் கடுமையான எலும்பு முறிவுகள் ஏற்பட்டன. இதனால் கடந்த 18 ஆண்டுகளாகத் தனது சொந்தக் கால்களில் நிற்க முடியாமல், அவர் படுக்கையிலேயே முடங்கிப் போய் வாழ்க்கைப் போராட்டத்தை நடத்தி வருகிறார்.

நீண்ட நாட்களாகத் தொடரும் இச்சிகிச்சையால் அவரது குடும்பத்தின் சேமிப்பு அனைத்தும் கரைந்து, வீட்டிலிருந்த விலையுயர்ந்த பொருட்களும் விற்கப்பட்டு விட்டன. ஓய்வுபெற்ற தனியார் ஊழியரான அவரது வயதான தந்தை, தாய் மற்றும் மூத்த சகோதரியுடன் வசிக்கும் நாகேஷின் மருத்துவச் செலவுக்குத் தற்போது அவரது நண்பர்கள் தங்களின் மாதச் சம்பளத்திலிருந்து ஒரு தொகையை வழங்கி உதவி வருகின்றனர். இருப்பினும், நாளுக்கு நாள் அதிகரிக்கும் மருத்துவச் செலவுகளைச் சமாளிக்க முடியாத நிலை உள்ளது. இதைக் கண்டு கண்ணீர் வடித்த அவரது தாய், அரசு வழங்கும் ஒருமுறை நிவாரண நிதிக்கு பதிலாக, நாகேஷின் மருந்துகள் மற்றும் சிகிச்சைக்குத் தடையின்றி உதவக்கூடிய வகையில் மகாராஷ்டிர முதல்வரிடம் மாதந்தோறும் நிரந்தர நிதி உதவி வழங்குமாறு உருக்கமாகக் கோரிக்கை விடுத்துள்ளார்.

படுக்கையிலேயே இருக்கும் நாகேஷ் போய்ர், நாடு முழுவதும் உள்ள இளைஞர்களுக்கு ஒரு உருக்கமான செய்தியை வெளியிட்டுள்ளார். தயிர் ஹண்டி விழாவை வெறும் விளையாட்டு மற்றும் பண்டிகையின் உணர்வோடு மட்டுமே அணுக வேண்டும் என்றும், புகழ் மற்றும் பணத்திற்காகத் தங்களின் உயிரைப் பணயம் வைக்க வேண்டாம் என்றும் அவர் கேட்டுக்கொண்டுள்ளார். ஒரு சிறிய விபத்து ஒரு நபரின் வாழ்க்கையை மட்டும் முடிப்பதில்லை, மாறாக ஒரு மகிழ்ச்சியான முழு குடும்பத்தின் வாழ்வையும் வாழ்நாள் முழுமைக்கும் சீரழித்துவிடும் என்று அவர் எச்சரித்துள்ளார்.