“நான் யாரையும் குறிப்பிட்டு பேசல” பிக் பாஸ் சர்ச்சைக்கு முற்றுப்புள்ளி வைத்த விஜய் சேதுபதியின் அதிரடி விளக்கம்..!!

பிக் பாஸ் தமிழ் சீசன் 10 நிகழ்ச்சியைத் தொகுத்து வழங்கி வரும் பிரபல நடிகர் விஜய் சேதுபதி, வார இறுதி எபிசோடில் தான் பேசிய கருத்துகள் குறித்து முக்கிய விளக்கத்தை அளித்துள்ளார். கடந்த வாரம் போட்டியாளர் ஷாதிகாவிடம் தலைமைப் பண்பு, வாக்குறுதிகள் மற்றும் பொறுப்புகள் குறித்து அவர் விவாதித்த உரையாடல், சமூக வலைதளங்களில் அரசியல் ரீதியாகப் பலவாறாகத் திரித்துப் பேசப்பட்டது. குறிப்பாக, அது தமிழக முதலமைச்சர் சி. ஜோசப் விஜய்யின் அரசியல் நகர்வுகளை விமர்சிப்பது போல் இருப்பதாக நெட்டிசன்கள் பலரும் தங்களுக்குள் ஒப்பிட்டு விவாதிக்கத் தொடங்கினர்.

இந்தச் சூழலில், பிக் பாஸ் மேடையில் பேசப்படும் கருத்துகள் அனைத்தும் நிகழ்ச்சி போட்டியாளர்களுக்கும் தங்களுக்கு மட்டுமே சொந்தமானது என்றும், வெளியில் இருக்கும் எந்த ஒரு தனிநபரையும் அல்லது அமைப்பையும் சார்ந்து குறிப்பிடப்படவில்லை என்றும் விஜய் சேதுபதி திட்டவட்டமாகத் தெளிவுபடுத்தியுள்ளார். இந்த எளிய உண்மை பார்ப்பவர்கள் அனைவருக்கும் முன்னரே புரிந்திருக்கும் எனத் தான் நினைத்ததாகவும், ஆனால் முந்தைய வாரமே கூறியிருக்க வேண்டிய இந்த விளக்கத்தைத் தற்போதைய அசாதாரணச் சூழல் காரணமாக இப்போது தெளிவுபடுத்த வேண்டிய கட்டாயம் தனக்கு ஏற்பட்டுவிட்டதாகவும் அவர் வருத்தத்துடன் குறிப்பிட்டுள்ளார்.

இவ்விவகாரம் தொடர்பாக இந்நிகழ்ச்சியை ஒளிபரப்பும் விஜய் தொலைக்காட்சி நிர்வாகமும் ஏற்கனவே ஒரு அதிகாரப்பூர்வமான விளக்க அறிக்கையை வெளியிட்டிருந்தது. அதில், பிக் பாஸ் நிகழ்ச்சி என்பது அதன் தற்போதைய வடிவமைப்பு மற்றும் விதிகளுக்கு உட்பட்ட ஒரு பொழுதுபோக்குத் தளமே தவிர, இதில் பகிரப்படும் உரையாடல்களைப் பொழுதுபோக்காக மட்டுமே பார்க்க வேண்டும் என்றும், இதற்கும் வெளி உலக நிகழ்வுகளுக்கும் எவ்விதத் தொடர்பும் இல்லை என்றும் அவர்கள் தெளிவுபடுத்தியுள்ளனர். விஜய் சேதுபதியின் இந்த நேரடி விளக்கத்தைத் தொடர்ந்து, கடந்த சில நாட்களாக நிலவி வந்த அரசியல் விவாதங்களுக்கும் சர்ச்சைகளுக்கும் முற்றுப்புள்ளி வைக்கப்பட்டுள்ளது.