“குளிச்சு, புது சட்டை போட்டுதான் போனேன்…” 9½ மாச போராட்டத்துக்கு அப்புறம் கிடைச்ச வேலை… ஆனா சேர்ந்த 2½ மணி நேரத்துல தூக்கிட்டாங்க… என்ன காரணம் தெரியுமா..?!

அமெரிக்காவைச் சேர்ந்த ஒருவர் சுமார் 9.5 மாதங்கள் வேலையில்லாமல் இருந்த பிறகு, ஒரு தற்காலிக வேலைவாய்ப்பு முகமை மூலம் புதிய வேலை ஒன்றைப் பெற்றார். முந்தைய வேலையை விட இதில் நல்ல சம்பளம் கிடைத்ததால் அவர் மிகுந்த மகிழ்ச்சியடைந்தார். தன் வேலைவாய்ப்பு உதவித்தொகையும் முடிவுக்கு வந்த நிலையில் கிடைத்த இந்த வேலை அவருக்குப் பெரிய ஆறுதலாக இருந்தது. முதல் நாள் வேலைக்குச் செல்வதற்காக இரவிலேயே குளித்து, புதிய போலோ சட்டையைத் தயார் செய்து வைத்துவிட்டு, சரியான நேரத்தில் அலுவலகத்திற்குச் சென்றார். அங்குள்ள சூப்பர்வைசர் அவருக்கு அலுவலகத்தைச் சுற்றிக்காட்டி மற்ற ஊழியர்களிடம் அறிமுகப்படுத்தினார். அலுவலகத்தின் சமையலறை மற்றும் கழிப்பறை வசதிகளைப் பார்த்து அவர் மிகவும் ஈர்க்கப்பட்டார்.

காலை 10 மணியளவில் மற்றொரு ஊழியர் அவருக்குப் பயிற்சி அளிக்கத் தொடங்கினார். சிறிது நேரத்திற்குப் பிறகு வந்த சூப்பர்வைசர், மதிய உணவை வழக்கத்தை விட முன்னதாகவே முடித்துக் கொள்ளுமாறு கூறிவிட்டு, பயிற்சி அளித்த ஊழியரை ஒரு கூட்டத்திற்கு அழைத்துச் சென்றார். பயிற்சி அளித்தவர் திரும்பியதும், தான் ஒரு அவசர வேலையை முடிப்பதாகக் கூறி அவரை அமர்ந்திருக்குமாறு தெரிவித்தார். பின்னர், சூப்பர்வைசர் அவரை மீண்டும் மதிய உணவிற்குச் செல்லுமாறு கூறினார். ஆனால், அவர் அலுவலகத்தை விட்டு வெளியேறத் தொடங்கியபோதே, அவருக்கு வேலை வாங்கித் தந்த முகமையிடமிருந்து ஒரு தொலைபேசி அழைப்பு வந்தது. அதில், “சுகாதாரப் பிரச்சினை” காரணமாக நிறுவனம் அவரை வேலையிலிருந்து நீக்கிவிட்டதாகத் தெரிவிக்கப்பட்டது.

வேலைக்குச் சேர்ந்த வெறும் 2.5 மணி நேரத்திலேயே நீக்கப்பட்டது குறித்து அந்த நபர் Reddit தளத்தில் தனது அனுபவத்தைப் பகிர்ந்து அதிர்ச்சி தெரிவித்தார். தான் நன்றாகக் குளித்து, சுத்தமான புதிய சட்டையை அணிந்துதான் சென்றதாகவும், துணிகளில் சிறிய தூசி போன்றதைத் தவிர வேறு எந்தச் சுகாதாரக் குறைபாடும் தன்னிடம் இல்லை என்றும் அவர் கூறினார். அவர் தனது நண்பர்களிடம் கேட்டபோதும், அவரிடம் எந்தவித துர்நாற்றமும் வீசவில்லை என்றும், மிகவும் அருகில் சென்று பார்த்தபோது லேசான வேர்வை வாசனை மட்டுமே இருந்ததாகவும் தெரிவித்தனர். தினமும் பல் துலக்குவது, புகைபிடிக்காதது எனத் தன் சுகாதாரத்தைப் பராமரித்தும் என்ன நடந்தது என்று புரியாமல் அவர் தவித்தார். Reddit பயனர்கள் பலர் அவருக்கு ஆறுதல் கூறியதுடன், நிறுவனம் வேறு ஏதோ காரணத்திற்காக அவரை நீக்கிவிட்டுச் சுகாதாரத்தைக் சாக்காகக் கூறியிருக்கலாம் எனத் தங்கள் கருத்துகளைப் பதிவிட்டனர்.